पूर्वी पहाडी जिल्ला इलाममा ग्यास अभाव भएको छ । 

कोरोना भाइरसका त्रासका कारण उपभोक्ताले सिलिण्डर भरेर राख्न थालेपछि बजारमा ग्यास अभाव भएको हो ।

बजारमा ग्यास अभाव भएपछि उपभोक्ता मारमा परेका छन् । विशेष गरेर कोठा बस्ने विद्यार्थी, कर्मचारी, गृहिणी, होटल व्यवसायी लगायत समस्यामा परेका छन् । 

होटलमा खाना, खाजा, चिया खान आउने सेवाग्राहीलाई पनि फर्काउनुपर्ने स्थिति आउने भन्दै यसतर्फ सम्बन्धित निकायको ध्यान जान आवश्यक रहेको होटल व्यवसायीको भनाइ छ । 

सहज रुपमा ग्यास आपूर्ति नहुँदा बजारी क्षेत्रमा बसोबास गर्ने बासिन्दालाई समस्या भएको छ । सरकारी निकायबाट बजारमा ग्यासको अभाव नभएको भन्ने गरे पनि बजारमा ग्यास पाउन नै छोडेको छ । यसले गर्दा उपभोक्तालाई समस्या भएको छ । पुरानो सिलिण्डर बुझाएको १५ दिन बित्दा पनि ग्यास पाउन समस्या हुँदा उपभोक्तालाई मारमा परेको स्थानीयको भनाइ छ । 

इलाम बजारका स्थानीय बालकुमार पोख्रेलले ग्यास अभावका कारण खाना खान नै समस्या आउने भन्दै बेलैमा समस्याको समाधान गर्न लाग्नुपर्नेमा जोड दिए ।

उनले एउटा सिलिण्डर बुझाएको र अर्को सिलिण्डर डिलरमा बुझाएको १० दिन बितिसक्दा समेत नयाँ सिलिण्डर नपाएको गुनासो गरे ।

ग्यास अभाव हुनुमा सबैभन्दा बढी दोषी उपभोक्ता नै भएको बिक्रेताको भनाइ छ । कोरोना भाइरसको त्रासले उपभोक्ताले ग्यास भरेर घरमा राखेका कारण यस्तो समस्या आएको बताइएको छ । 

भाइरस भित्रिए भारतले नाका शिल गर्दै जाने र ग्याससमेत नपठाउने भएकाले उपभोक्ताले ग्यास आउने बित्तिकै लैजाने र स्टक गर्ने भएकाले यस्तो स्थिति आएको कोशी ग्यास डिलर इलामका माधव श्रेष्ठले बताए । उनका अनुसार महिना दिनअघि मासिक १ हजार ६०० को हाराहारीमा ग्यास आउने गरेको थियो तर अहिले २ हजार ४०० माथि ग्यास सिलिण्डर आउँदा पनि ग्यास हाहाकार हुनुमा उपभोक्ताकै कारण समस्या आएको उनले बताए । 

व्यापारीले कालाबजारी गरेको हो वा हुनेखाने उपभोक्ताले बजार कब्जा गरेको हो भन्ने विषयमा अनुसन्धान र खोजी गर्न जरुरी रहेको उनको भनाइ छ तर सामान्य जीवनस्तरमा चल्ने उपभोक्तालाई भने अत्यन्तै समस्या भएको छ ।