विगत १० वर्षदेखि बन्द अवस्थामा रहेको बुटवलस्थित धागो कारखानालाई अस्थायी अस्पतालका लागि प्रयोग गरिने भएको छ ।

बुटवल उपमहानगरपालिका र लुम्बिनी प्रादेशिक अस्पतालको सहकार्यमा बुटवल–१० स्थित कारखानामा कोरोना भाइरसका संक्रमितलाई राख्ने गरी आइसोलेनस अस्पतालको रुपमा प्रयोग गर्न लागिएको हो ।

नगर प्रमुख शिवराज सुवेदीको विशेष पहल र लुम्बिनी प्रादेशिक अस्पतालका अध्यक्ष सूर्यबहादुर भट्टराईसहित प्राविधिक, विशेषज्ञको टोली शुक्रवार बिहानैदेखि स्थलमा खटिएको छ । बुटवलमा क्वारेन्टाइनका लागि १०० कोठा तयार पारिएका छन् भने आइसोलेसनका लागि धागो कारखानामा करीब १०० शय्याको अस्पताल तयार पार्न लागिएको छ ।

प्रादेशिक अस्पताल, निजी तथा सामुदायिक अस्पतालको समेत सहकार्यमा बुटवल कोरोना विशेष (अस्थायी) अस्पताल निर्माणको काम तीब्र पारिएको प्रमुख शिवराज सुवेदीले जानकारी दिए । बुटवल उपमहानगरले सामुदायिक र निजी अस्पतालका सञ्चालकलाई बोलाएर आपतकालीन अवस्थालाई मध्यनजर गर्दै तम्तयार रहन आग्रह गरेको थियो ।

लामो समयदेखि बन्द रहेको बुटवल धागो कारखानाको एउटा ब्लकलाई अस्पतालको मापदण्डअनुसार तयार पारेर फिनिसिङ गर्ने काम भइरहेको प्रमुख सुवेदीले बताए । पहिलो चरणमा एउटा ब्लकमा १०० शय्याको आइसोलेसन कक्ष निर्माण गर्ने काम चलिरहेको छ ।

हाल आइसोलेसनसँगै बाहिरी क्षेत्रमा घेरवार लगाउने, शौचालय बनाउने र भवन परिसरलाई नै संक्रमणरहित बनाउनेतर्फ लागेको प्रमुख प्रशासकीय अधिकृत चक्रपाणी शर्माले बताए । प्रादेशिक अस्पतालका अध्यक्ष सूर्यबहादुर भट्टराईले अस्पतालका फोकलपर्सन र विशेषज्ञलाई समेत निरीक्षण गराएर आइसोलेसन तयार पार्न लागिएको बताए ।

अस्पतालका शय्याका अतिरिक्त उपमहानगरले बनाउन लागेको अर्को अलग्गै र अस्थायी अस्पताल हो । बुटवलमा हाल आइसोलेसनका लागि ३४ शय्या तयारी अवस्थामा रहेको प्रदेशका स्वास्थ्य निर्देशक डा. विनोद गिरीले बताए ।