विश्वव्यापीरूपमा फैलँदै गएको कोरोना भाइरस (कोभिड–१९) को संक्रमणलाई मध्यनजर गर्दै नुवाकोट र काभ्रेपलाञ्चोक जाने यात्रुलाई निःशुल्क बससेवा सञ्चालन गरिने भएको छ ।

ग्रेटफुल टुर्स एण्ड ट्रान्सपोर्ट प्रालिले नुवाकोटको त्रिशूली र काभ्रेपलाञ्चोकको दोलालघाटसम्म जानका लागि आइतवारदेखि ४ बस सञ्चालन गर्न लागेको हो । तीमध्ये २ काभ्रेपलाञ्चोक र २ नुवाकोट जानेछन् ।

ट्रान्सपोर्टका प्रबन्ध निर्देशक रमेश गौतमले सवारीसाधन नपाएर नुवाकोट र काभ्रेपलाञ्चोक जान रोकिएका यात्रुलाई मध्यनजर गरेर निःशुल्क बस सञ्चालन गर्न लागेको जानकारी दिए ।

‘आइतवारदेखि सञ्चालन हुने बससेवा यात्रुको संख्यामा वृद्धि भएर विस्तारै बढाउँदै लान्छौं,’ उनले भने । देशलाई दुःख परेका बेला आफूले सहयोग गर्न लागेको प्रबन्ध निर्देशक गौतमको भनाइ थियो । 

विश्वमा फैलिएको कोभिड–१९ को संक्रमण नेपालमा फैलन नदिन सरकारले यही चैत १० गतेदेखि लामो दूरीमा चल्ने सार्वजनिक सवारीसाधन आवतजावतमा रोक लगाउने निर्णय समेत गरिसकेको छ ।