गृह मन्त्रालयले विभिन्न क्षेत्रमा अलपत्र परेका व्यक्तिहरुको उद्धार गरी गन्तव्यमा पठाउने कार्य तीब्ररुपमा अघि बढेको जनाएको छ। 

गृहले शुक्रबार विज्ञप्ति जारी गरेर मुलुकका विभिन्न स्थानमा अलपत्र परेको स्वदेशी र विदेशी नागरिकलाई हवाई वा स्थल सवारीसाधनबाट उद्धार गर्ने कार्य भइरहेको जनाएको हो।

मुस्ताङ, कास्की, सोलुखुम्बुलगायतका विभिन्न जिल्लाबाट संस्कृति, पर्यटन तथा नागरिक उडड्यन मन्त्रालयको समन्वयमा हवाई तथा स्थल सवारीसाधनमार्फत बिहीबारदेखि नै उद्धार गरी काठमाडौँ ल्याइएका ३०७ जना विदेशी पर्यटकलाई जर्मनी दूतावासले व्यवस्थापन गरेको कतार एयरवेजको विमानमार्फत शुक्रबार पठाइएको छ । 

विभिन्न निर्माणसम्बन्धी कार्यहरु रोकिएको कारण कामदारको रुपमा कार्य गरिरहेका र हाल अलपत्र परेका नेपाली नागरिकलाई आआफ्नो गृह जिल्लासम्म उद्धार गरी पु¥याइदिन स्थानीय प्रशासन र सुरक्षाकर्मीलाई निर्देशन दिइएको मन्त्रालयद्वारा जारी विज्ञप्तिमा उल्लेख छ ।

यसैक्रममा हालसम्म रुपन्देही, बाँके, लमजुङ, पर्वत, कास्की, स्याङ्जा, दैलेख, तेह्रथुम लगायतका जिल्लाबाट उद्धार भइसकेको छ भने अन्य जिल्लामा त्यस्ता अलपत्र परेका नागरिकहरु भए उद्धार गर्ने कार्यमा समन्वय गर्न निर्देशन दिइएको छ ।