कोरोना प्रकोपविरुद्ध जिल्लास्तरीय समिति

प्रदेश सभा सदस्य विजय सुवेदीको संयोजकत्वमा कोरोना प्रकोपविरुद्ध जिल्लास्तरीय व्यवस्थापन समिति चितवन गठन भएको छ । 

जिल्लाका जनप्रतिनिधि, राजनीतिक दलका प्रमुख र सरोकारवालाको शुक्रवार साँझ जिल्ला प्रशासन कार्यालय चितवनमा भएको भेलाले १५ सदस्यीय समिति गठन गरेको हो ।
 
समितिको सदस्यमा भरतपुर महानगरपालिका प्रमुख रेनु दाहाल, जिल्ला समन्वय समिति चितवनका प्रमुख कृष्णकुमार डल्लाकोटी, प्रमुख जिल्ला अधिकारी नारायणप्रसाद भट्टराई, नेपाल कम्युनिस्ट पार्टी (नेकपा) चितवनका अध्यक्ष यमबहादुर परियार र नेपाली कांग्रेस चितवनका सभापति जीतनारायण श्रेष्ठ रहेका छन् ।
 
यस्तै समितिका सदस्यमा जिल्लामा रहेका मेडिकल कलेजका प्रमुख, निजी अस्पताल समन्वय समितिका अध्यक्ष, नेपाल चिकित्सक सङ्घका केन्द्रीय उपाध्यक्ष, भरतपुर महानगरपालिकाका स्वास्थ्य विज्ञ, उद्योग वाणिज्य सङ्घ चितवनका अध्यक्ष र उद्योग सङ्घ चितवनका अध्यक्ष रहनुभएको छ । समितिको आमन्त्रित सदस्यमा जिल्लाका सबै नगरपालिका र गाउँपालिका प्रमुख एवं जिल्ला प्र्रहरी कार्यालय चितवनका प्रमुखलाई राखिएको छ । 
 
समितिको सल्लाहकार संयोजकमा प्रतिनिधिसभा सदस्य कृष्णभक्त पोख्रेल र सहसंयोजकमा प्रदेशसभा सदस्य घनश्याम दाहाल रहनुभएको छ । सल्लाहकार समितिका सदस्यहरुमा जिल्लाका प्रदेशसभा सदस्य सबैलाई राखिएको छ । भेलाले समिति गठन गरेसँगै यस अघि गठन भएको भरतपुर कोरोना नियन्त्रण कार्यदललाई विगटन गरेको छ । 


Advertisement

भेलाले सो कार्यदलले सञ्चालन गरेको भरतपुर कोरोना विशेष (अस्थायी) अस्पतालको व्यवस्थापन भरतपुर अस्पतालको व्यवस्थापनमा समायोजन गर्ने निर्णय गरेको समितिका संयोजक सुवेदीले जानकारी दिनुभयो । भेलाले नेपाल सरकारसमक्ष जिल्लामा नै कोरोना परीक्षण र आवश्यक स्वास्थ्य सामग्री उपलब्ध गराउन आग्रह गर्ने निर्णय गरेको छ ।
 
संयोजक सुवेदीले यस समितिले स्वास्थ्यसँगै मानवीय संवेदनशीलतालाई मध्यनजर गर्दै एकद्वार प्रणालीबाट प्रकोप व्यवस्थापन गर्न जुट्ने बताउनुभयो । स्थानीय तह प्रदेश र सङ्घसँग समन्वय गरेर आफूले काम गर्ने उनको भनाइ छ ।
 


Advertisement

कमेन्ट गर्नुहोस्