ब्रिटिश एयरवेजले क्याबिन क्रु, ग्राउन्ड स्टाफ, इन्जिनीयर र कार्यालयका कर्मचारी लगायतका ३६ हजार कर्मचारीलाई निलम्बन गर्ने भएको छ । कोरोनाभाइरस महाव्याधिका कारण उसले यस्तो निर्णय लिन लागेको हो । 

एयरवेजले आफ्ना विमानहरू लन्डनको ग्याटविक विमानस्थलमा थन्क्याएको छ र कर्मचारी युनियनसँग एक हप्तादेखि कुराकानी गरिरहेको छ । 

दुई पक्षले मोटामोटी सहमति गरिसकेका छन् तर केही सूक्ष्म कुरामा सहमति हुन बाँकी छ । 

सहमतिअनुसार, ब्रिटिश एयरवेजका ८० प्रतिशतसम्म कर्मचारीहरूलाई लामो छुट्टीमा पठाइनेछ तर कसैलाई पनि जागिरबाट निकालिने छैन । 

महाव्याधि अन्त्य नहुन्जेलसम्म ग्याटविक र लन्डन सिटी एयरपोर्टमा कार्यरत ब्रिटिश एयरवेजका सबै कर्मचारीलाई निलम्बन गरिनेछ किनकि त्यहाँ विमानहरू आउजाउ गरिरहेका छैन् । हीथ्रो विमानस्थलमा भने ब्रिटिश एयरवेजको सेवा जारी छ ।

निलम्बनमा परेकाहरूले सरकारी योजनाअन्तर्गत तलबको ८० प्रतिशत रकम पाउनेछन् ।