कोरोना भाइरस महामारीविरुद्ध लड्न गैरआवासीय नेपाली संघले आह्वान गरेअनुसार एनआरएनए युरोपले ६० लाख रुपैयाँ बराबरको सहयोग गर्ने निर्णय गरेको छ । 

३१ मार्चमा युरोपियन क्षेत्रको बैठक युरोप संयोजक नारायण आचार्यको अध्यक्षतामा बसेर आर्थिक सहयोग गर्ने निर्णय गरेको हो । सहयोग रकम युरोपमा रहेका नेपालीहरूका लागि खर्च गरिनेछ ।

कोरोनाविरुद्ध लड्न युरोपका सम्पूर्ण एनसीसीको ऐक्यबद्धताका साथ न्यूनतम ५० हजार यूरोको आपतकालीन कोष स्थापना गर्दै अत्यावश्यक सहयोगको लागि कोरोना प्रभावित स्थानमा परिचालन गर्ने निर्णय भएको छ ।

स्काइपको माध्यमबाट सम्पन्न अनलाइन बैठकमा विशेष आमन्त्रितको रुपमा महासचिव डा. हेमराज शर्मा, कोषाध्यक्ष महेश श्रेष्ठ, सहकोषाध्यक्ष लोक दाहालले समेत सम्बोधन गरेका थिए । एनआरएन केन्द्रले कोरोनाविरुद्ध लिएका कदमबारे बैठकलाई जानकारी गराएका थिए ।

संयोजक नारायण आचार्यको अध्यक्षतामा तीनै जना उपसंयोजक, युरोप क्षेत्रबाट प्रतिनिधित्व गर्ने सम्पूर्ण आईसीसी सदस्य, मानार्थ परिषद् सदस्य, एनसीसी अध्यक्ष तथा महासचिव र युरोप क्षेत्र महिला तथा युवा संयोजक समेत रहेको एनआरएनए युरोप कोभिड–१९ सहयोग समिति समेत गठन भएको छ ।

जसको ९ सदस्यीय सचिवालयमा संयोजक नारायण आचार्य, उपसंयोजक त्रयमुक्त बहादुर गुरुङ, कृष्णप्रसाद तिमिल्सिना र शुक्रराज न्यौपाने तथा आईसीसी सदस्यहरू रामशरण सिम्खडा (यूके), आईसीसी सदस्य सुभाष जोशी (बेल्जियम), आईसीसी सदस्य सुनिल रानाभाट (स्पेन), आईसीसी सदस्य बिजय मोक्तान (जर्मन) र आईसीसी सदस्य चिन्तामणि सापकोटा (स्पेन) रहेका छन् । 

बैठकले केन्द्रमा गठित स्वास्थ्य कार्यदलसँगको निकट सहकार्यमा युरोप क्षेत्रमा रहेको स्वास्थ्य विज्ञहरू रहने गरी डा. बोधराज सुवेदी संयोजक रहेको एक उपसमिति समेत गठन गरेको छ ।

समितिले तत्कालै कामको थालनी गर्दै कोरोनाको चरम प्रभाव रहेको युरोपका देशको खास समस्याको सुक्ष्म पहिचान गरी लगत राख्न शुरू गर्ने, सहयोगको आधार तथा प्रकार अल्पकालीन तथा दीर्घकालिन रुपमा गर्न सकिने सहयोगको समेत पहिचान गरी मूल समितिमा शीघ्र प्रतिवेदन समेत पेश गर्ने निर्णय गरेको छ ।

गैरआवासीय नेपाली संघ केन्द्रमा रहेको उच्चस्तरीय समितिसँग समेत समन्वय गरी युरोप क्षेत्रमा काम गर्ने तथा केन्द्र संघ आपसी सहयोगको लागि आह्वान समेत गर्ने बैठकले निर्णय गरेको जानकारी बैठकमा सहभागी आईसीसी सदस्य रामशरण सिम्खडा दिए ।

आईसीसी सदस्य सुवास जोशीले छिटोभन्दा छिटो युरोपका राष्ट्रिय समन्वय समितिसँग परामर्श गरी नेपाली समुदायको आवश्यकता अनुसार मास्क, स्यानिटाइजर र पञ्जाको व्यवस्थापन गर्न पहल गरिने बताए ।