कोरोनाभाइरसका कारण संसारै अहिले असहाय देखिएको छ । यसले ५३ हजारभन्दा बढी मानिसको ज्यान लिइसकेको छ । मर्नेमध्ये अधिकांश विकसित देशका मानिस छन् । 

कोरोना संक्रमण रोक्नका लागि विभिन्न देशले फरक फरक किसिमका उपाय अपनाइरहेका छन् । तर संक्रमण रोक्न निकै गम्भीरता देखाएका पाँच देशको मात्र हामी यहाँ चर्चा गर्र्दैछौं । 

चीन
कोरोनाभाइरस महाव्याधिको संक्रमण चीनको वुहान शहरबाट शुरू भएको हो । चीनले सार्स महामारीविरुद्ध लडेको अनुभव हासिल गरिसकेको थियो र त्यही अनुभव उसलाइ कोरोना संक्रमणमा लड्दा पनि काम लाग्यो । चीनले कोरोना फैलिने प्रतीक्षा नगरिकन संक्रमित मानिसको पहिचान गर्न थाल्यो र स्वास्थ्य परीक्षण बढायो । 

चीनले मार्चको अन्तिमसम्ममा तीन लाख २० हजारभन्दा बढी टेस्ट गर्‍यो । कोरोनाको टेस्ट प्रक्रियाको शुरूआत गर्ने पहिलो देश चीन नै हो र त्यसको विस्तृत जानकारी वुहानमा लकडाउन लगाउनुभन्दा अघि नै विश्व स्वास्थ्य संगठनको वेबसाइटमा पोस्ट गरियो । कोरोना जाँचको किट पनि चीनले तीव्र गतिमा बनायो । 

जर्मनी
जर्मनीले पनि कोरोनाभाइरस वैश्विक समस्या बन्दैछ भन्ने कुरा बुझेर त्यसविरुद्ध लड्न शुरू गरिहाल्यो । धेरैजसो देशले कोरोना चीनको आन्तरिक समस्या हो भनी हात बाँधेर बस्दा जनवरीको आरम्भतिरै बर्लिनका वैज्ञानिक ओल्फर्ट ल्यान्ड्टले यो भाइरस सार्ससँग मिल्ने र यसका लागि परीक्षण किट आवश्यक रहेको अनुभव गरे । ओल्फर्ट र उनको टोलीले सार्सको अध्ययनका आधारमा किट बनाए । विश्व स्वास्थ्य संगठनको वेबसाइटमा यस प्रक्रियाको जानकारी जनवरी १७ मै प्रकाशित भयो । फेब्रुअरीको अन्त्यसम्म ४० लाख किट तयार पारियो । जर्मनीले दिनमा १२ हजार मानिसको स्वास्थ्य परीक्षण गरायो ।

दक्षिण कोरिया
कोरोना रोक्न दक्षिण कोरियाले निकै आक्रामक कदम चाल्दै ठूलो संख्यामा मानिसहरूको स्वास्थ्य परीक्षण गर्‍यो । कार पार्किङ र शपिङ मलहरूमा पनि स्वास्थ्य परीक्षण गर्न थालियो । दक्षिण कोरियालाई यो भाइरस वुहानमा मात्र सीमित हुने छैन भन्ने थाहा थियो । त्यसपछि उसले कुनै शुल्क नलिइकन हरेक दिन १५ हजार मानिसको स्वास्थ्य परीक्षण गर्न थाल्यो । अनेकौं स्थानमा परीक्षण बूथ बनाइयो । यही सक्रियताका कारण दक्षिण कोरियाले कोरोनाभाइरस नियन्त्रणमा लियो । 

आइसल्यान्ड
आइसल्यान्ड जनसंख्याको हिसाबले सानो र धनी देश हो । उसले कोरोना परीक्षणमा कुनै कसर बाँकी राखेन । जुन अनुपातमा त्यहाँ परीक्षण गरियो, त्यति अन्त कतै पनि गरिएन । आइसल्यान्डका महामारी विशेषज्ञ थोरोल्फर गुआनसनले बजफीडलाई बताएअनुसार, त्यहाँको जनसंख्याका कारण स्वास्थ्य परीक्षणको पर्याप्त क्षमता विकास गर्न सकियो । व्यापक मात्रामा टेस्ट गर्दा मात्र यस महामारीलाई नियन्त्रण गर्न सकिन्छ । 

सिंगापुर
डिसेम्बर ३१ मा संसारले कोरोनाभाइरसको बारेमा थाहा पाएपछि सिंगापुर चुप लागेर बसेन । आफ्नो देशमा कोरोना आउला र भनी हात बाँधेर बस्ने अन्य मुलुकको विपरीत सिंगापुरले व्यापक मात्रामा मानिसहरूको स्वास्थ्य परीक्षण गर्‍यो र संक्रमित व्यक्तिको सम्पर्कमा आएका सबैलाई खोज्यो । 

कोरोना पोजिटिभ पाइएका सबैलाई उसले अस्पतालमा राख्यो । संक्रमितका परिवारका सदस्यलाई घरैमा क्वारेन्टाइनमा बस्न भनियो र दिनको पाँचचोटि एसएमएस गरेर स्वास्थ्यको जानकारी लिइयो । 

सामाजिक दूरी कडाइका साथ पालन गर्न लगाइयो । मानिसहरूलाई सचेत बनाउनका लागि प्रभावशाली सन्देशहरू प्रवाह गरियो ।