उपचारको क्रममा बुटवलको कोरोना विशेष अस्पतालमा मृत्यु भएका रुपन्देहीको सैनामैनाका बाबुराम थापाको शव सातौं दिनसम्म पनि उठ्न सकेको छैन ।

कोरोनाको रिपोर्ट नेगेटिभ आएपनि कोरोना हुनसक्ने र सर्नसक्ने आशंकामा उनका आफन्त शव उठाउन समेत आएका छैनन् । 

चैत १६ गते मृत्यु भएका थापाको शव अहिले लुम्बिनी प्रादेशिक अस्पतालको शव गृहमा छ । लुम्बिनी प्रादेशिक अस्पतालका अध्यक्ष सूर्यबहादुर भट्टराईले आफन्तले शव लिन नआएको बताए ।

थापाकी पत्नी रीताले अस्पतालको लापरवाहीले मृत्यु भएको भन्दै राहत उपलब्ध गराउनुपर्ने माग गरेकी छन् । रीताले भनिन्, ‘अस्पतालले आएर शव लैजान भनिरहेका छन् तर अस्पतालको गम्भीर लापरवाहीले सामान्य बिरामीको मृत्यु भयो । राहत उपलब्ध गराउने प्रतिवद्धता नगराएसम्म हामी शव बुझ्दैनौं ।’ 

स्थानीय संघसंस्था र विभिन्न राजनीतिक दलले पीडित परिवारलाई राहत दिन आग्रह गरेका छन् तर अस्पतालले उपचारमा कुनै कमी नभएको भन्दै राहत दिन नसकिने बताएको छ ।

५ नम्बर प्रदेशका सामाजिक विकास मन्त्री सुदर्शन बरालले भने, ‘अस्पतालमा पर्याप्त उपकरण नभएको हो तर उपचारमा नेक्लिजेन्सी भएको होइन ।’

चैत ६ गते यूएईबाट आएका थापा आउँदा नै ज्वरो आएको थियो । उनले घरमा आएपछि नजिकैको मेडिकलमा गएर चेकजाँच गरी औषधि खाए । उनलाई टाइफाइटको समस्या देखिएको थियो ।

घरपरिवार र छिमेकीले कोरोनाका लक्षण देखिएपछि उनी आफैं अटोरिक्सा रिजर्ब गरी लकडाउनको समयमा बुटवलस्थित लुम्बिनी प्रादेशिक अस्पतालमा उपचारका लागि आएका थिए । 

चैत १३ गते अस्पताल भर्ना भएका उनीको स्वाब ४ दिनसम्म पनि अस्पतालले चेकजाँचका लागि नपठाएर लापरवाही गरेको रीताको भनाइ छ । उनका २ छोरा छन । बाबुराम विदेशबाट आएपछि क्वारेन्टाइनमा बसेनन् ।