मुलुककै सबैभन्दा बढी कोरोना भाइरस संक्रमित बिरामी रहेको धनगढी शहरसहित कैलाली जिल्लामा थप कडाइ गरिने भएको छ ।

धनगढी उपमहानगरपालिकाले शनिवार एक अपिल जारी गर्दै चैत २३ गतेदेखि पूूर्णरुपमा बन्द गर्ने जनाएको छ ।

धनगढीको सेती प्रादेशिक अस्पतालमा हाल ४ जना कोरोना भाइरस संक्रमणका बिरामी उपचाररत छन् । देशभर ९ जना संक्रमित भेटिएकोमा १ जना निको भइसकेका छन् ।

नगर प्रमुख नृपबहादुर वडद्वारा जारी विज्ञप्तिमा भनिएको छ, ‘ धनगढीमा कोरोना भाइरस (कोभिड १९ ) का संक्रमितहरू भेटिएको स्वास्थ्य तथा जनसंख्या मन्त्रालयले पुष्टि गरेकाले पनि हामी थप जोखिममा रहेका छौं । त्यसैले २०७६ चैत २३ गते बिहानैदेखि लागू हुने गरी सम्पूर्ण खाद्यान्न, तरकारी लगायत दैनिक उपभोग्य सामग्रीका पसलहरू, सबै किसिमका सवारीसाधन पूर्णरुपमा बन्द गरेर सहयोग गरिदिनहुन ब्यापारी मित्रहरूमा अनुरोध गर्दछौं ।’

बन्दको अवधिमा आवश्यक खाद्यवस्तुहरू घरघरमै पुर्‍याइने जनाइएको छ । विज्ञप्तिमा अगाडि उल्लेख छ, ‘अतिआवश्यक दैनिक उपभोग्य वस्तुको होम डेलिभरी गरिदिन हुन उद्योग वाणिज्य संघ कैलाली, किराना व्यवसायी संघ कैलाली, दुग्ध व्यवसायी, तरकारी व्यवसायी लगायतका सबैमा आग्रह  गर्दछौं । यो निर्णयको कार्यान्वयनमा सहयोग पुर्‍याइदिनहुन स्थानीय प्रशासन र प्रहरीसँग अनुरोध गर्दै निर्णयले पार्न जाने असरलाई बाध्यात्मक अवस्थाको रुपमा बुझिदिनहुन नगरबासीमा आग्रह गर्दछौं ।’