परजीवी मार्नका लागि संसारभरि उपलब्ध एक औषधिले प्रयोगशालमा राखिएका कोशिकाका कोरोनाभाइरसलाई ४८ घन्टामा मारेको शोधकर्ताहरूले पत्ता लगाएका छन् । यो खोजपछि कोभिड–१९ विरुद्धको नयाँ क्लिनिकल थेरापीको विकास तथा परीक्षणको बाटो खुलेको छ । 

एन्टीभाइरल रिसर्च जर्नलमा प्रकाशित अध्ययन अनुसार, इभरमेकटिन नामक औषधिले सार्स–कोभ–२ भाइरसलाई कोशिकामा ४८ घन्टाभित्र मारेको हो । 

‘एउटा डोज मात्रले पनि सबै भाइरल आरएनए हटाएको र २४ घन्टामा मात्र पनि निकै घटाएको हामीले पायौं,’ अध्ययनमा संलग्न शोधकर्ता काइली वागस्टाफले बताइन् । उनी अस्ट्रेलियाको मोनाश विश्वविद्यालयमा आबद्ध छिन् । 

वैज्ञानिकहरूले इभरमेकटिन परजीवीनिरोधी औषधि भएको र यसले एचआईभी, डेंगु, इन्फ्लुएन्जा र जिका भाइरस लगायतविरुद्ध प्रयोगशालामा प्रभावकारी देखिएको बताए । 

तर यो प्रयोगशालामा गरिएको परीक्षण मात्र भएको र मानव शरीरमा यसको परीक्षण गर्नुपर्ने आवश्यकता रहेको वागस्टाफले चेतावनी दिइन् ।