लकडाउन पछिको योजना बनाउन मन्त्रीहरुलाई मोदीको निर्देशन

भारतीय प्रधानमन्त्री नरेन्द्र मोदीले लकडाउनपछिका लागि विषेश योजना बनाउन संघीय मन्त्रीहरुलाई निर्देशन दिएका छन्। उनले मुख्य दश निर्णयका लागि तयारी गर्न र प्राथमिकताका दश क्षेत्र किटान गर्न मन्त्रीहरूलाई सोमबार निर्देशन दिएका हुन्।

कोरोना भाइरसको संक्रमणका कारण देशका धेरै क्षेत्रमा दीर्घकालिन असर पर्ने भएकाले त्यसको सामना गर्नका लागि विषेश योजना, कार्यक्रम र रणनीतिहरु बनाउनुपर्नेमा प्रधानमन्त्री मोदीको जोड थियो। 


Advertisement

आफ्नो मन्त्रीपरिषद्का सदस्य मन्त्रीहरुसँग सोमबार भिडियो बैठक गर्दै उनले कोरोनापछि, ‘भारत बनाऔँ’ अभियान चलाउने गरी कार्यक्रमहरू ल्याउनुपर्ने बताएका थिए।
उनले राष्ट्रिय तथा अन्तर्राष्ट्रिय क्षेत्रबाट शिक्षा लिँदै सङ्कटलाई अवसरको रूपमा सदुपयोग गर्नु पर्नेमा पनि जोड दिए। प्रधानमन्त्री मोदीले अहिलेको सङ्कटबाट चिकित्सा क्षेत्रलाई आत्म निर्भर बनाउनु पर्ने पाठ सिकिएको पनि बताए।

आन्तरिक उत्पादनलाई जोड दिँदै निर्यात गर्न सकिने नयाँ क्षेत्र र देशहरूको पहिचान गर्न र कार्यान्वयन गर्न सकिने योजनाहरू ल्याउन उनले आह्वान गरे। प्रधानमन्त्री कार्यालद्वारा जारी वक्तव्यमा प्रधानमन्त्री मोदीले प्रान्तीय तथा जिल्लास्तरीय प्रशासनलाई सङ्कट निवारणका लागि पर्याप्त रूपमा परिचालन गर्न तथा उनीहरुसँग राम्रो सम्पर्कमा रहन पनि आग्रह गरेको उल्लेख छ।   


Advertisement

उनले सङ्कटका कारण उत्पन्न पछिल्लो अवस्थाका बारेमा वास्तविक अवस्था अध्ययन गरी समस्याहरूको समाधानका उपायहरू पिहल्याउन लगाएको वक्तव्यमा जनाइएको छ। भारतमा कोरोना भाइरसको संक्रमण फैलिदै गएपछि गत मार्च २४ तारिखदेखि लागु हुनेगरी यही अप्रिल १४ तारिखसम्मका लागि २१ दिने देशव्यापी लकडाउन गरिएको छ । 
 

एजेन्सी
एजेन्सी

लेखकबाट थप...

कमेन्ट गर्नुहोस्