चीनमा बाहिरबाट आएका मानिसको संक्रमण ह्वात्तै बढेर ९५१ पुगेपछि सीमामा कडीकडाउ गर्न थालिएको छ । यससँगै लक्षण नदेखिने केसहरू पनि बढेकाले कोरोनाभाइरस संक्रमणको दोस्रो लहर आउने डर पनि बढेको छ । 

चीनमा संक्रमण फैलिन नदिन कडा उपायहरू अपनाइएको भए पनि बाहिरका देशबाट घर फर्केका चिनियाँहरू संक्रमित पाइएका छन् । 

बेइजिङका एक अधिकारीले शहरमा कोरोनाभाइरस महामारी नियन्त्रणका उपाय लामो समयसम्म जारी रहने चेतावनी दिए । 

राष्ट्रिय स्वास्थ्य आयोगका प्रवक्ता मी फङले संक्रमण फैलिएका विभिन्न देशमा रहेका चिनियाँ नागरिकलाई चीनमा ल्याइएको र तीमध्ये ९५१ मा संक्रमण भेटिएको जानकारी दिए । 

चीनमा बाहिरबाट आएको संक्रमणको केस बढिरहेको र यसले दबाब दिएको उनको भनाइ छ ।

अहिले चीनले कुनै पनि विदेशीलाई मुलुक प्रवेश गर्न दिएको छैन र बाहिर बस्ने चिनियाँहरूलाई मात्र ल्याइरहेको छ । 

तर लक्षण नदेखिएका वाहकका कारण भाइरस संक्रमण फर्कने डर भने बढेर गएको छ ।