चीन र अमेरिकाबीच कोरोनाभाइरसका विषयमा आरोप प्रत्यारोप जारी

कोरोनाभाइरस कहाँ उत्पत्ति भएको हो भन्ने विषयमा चीन र अमेरिकाले केही समययता विवाद गर्दै आएका छन् । 

यसैबीच चीनको एक सुपरकम्प्युटरले अमेरिकाको अस्पतालमा सन् २०१९ मा आएको रहस्यमय निमोनिया कोरोनाभाइरस भएको हुन सक्ने निष्कर्ष निकालेको छ । 


Advertisement

तियानजिन स्थित नेसनल सुपरकम्प्युटर सेन्टरको तियान–१ मशिनले जुलाई महिनामा गम्भीर बिरामी भएका एक अमेरिकी रोगीको कम्प्युटराइज्ड एक्सियल टोमोग्राफस् स्क्यान इमेज निकालेको छ । चिनियाँ सुपरकम्प्युटरको स्क्यानिङको आधारमा उक्त व्यक्तिलाई कोरोनाभाइरस संक्रमण भएको प्रबल सम्भावना देखिएको बताइएको छ । 

रिपोर्टका अनुसार, उक्त रोगीको दुवै फोक्सोको तल्लो भागमा सेता धब्बाहरू पाइएका छन् । निमोनिया हुँदा यस्ता कुरा देखिँदैनन् । 


Advertisement

आर्टिफिसियल इन्टेलिजेन्सको रिपोर्ट अनुसार, इमेजमा कोभिड–१९ का केही लक्षण देखिन्छन् जसले गर्दा महामारीसँग सम्बन्धित जानकारी र अन्य क्लिनिकल टेस्ट गरेर डायग्नोसिस गर्न सुझाव दिइएको छ । 

अमेरिकाको सेन्टर्स फर डिजीज कन्ट्रोल यान्ड प्रिभेन्सनको वेबसाइट अनुसार, यो रोगी नर्थ क्यारोलाइनाको वेकमेड अस्पतालमा एकैचोटि भर्ना भएका पाँच रोगीमध्ये एक थियो । पाँचैजनाले सास फेर्न गाह्रो भएको, बान्ता आएको, छटपटी भएको र ज्वरो आएको जस्ता लक्षण अनुभव गरेका थिए । 

तर यी रोगीहरूको उपचार गरेका डा केभिन डेभिडसनले चिनियाँ सुपरकम्प्युटरका निष्कर्षलाई खारेज गरेका छन् । उनका अनुसार, यस्ता लक्षण अन्य संक्रमणमा पनि पाइन्छन् । 

डा डेभिडसनले भने, ‘अन्य भाइरल संक्रमण, लागूऔषध सेवन, फोक्सोका रोग र प्रदूषित वातावरणको सम्पर्कमा आउँदा पनि यस्ता लक्षण देखिन्छन् । चीनको सुपरकम्प्युटरले पहिचान गरेको लक्षण कोभिड–१९ र भेपिङका रोगीहरूमा उस्तै देखिन सक्छ ।’
 

एजेन्सी
एजेन्सी

लेखकबाट थप...

कमेन्ट गर्नुहोस्