वर्षौंदेखि मेरी पी कान्सास शहरका ठूला कार्यालयहरूको सरसफाइ गर्ने गर्थिन् । उनलाई एक कम्पनीले सफाइको काममा खटाएको थियो अनि एक दशकअघि एक्कासि उनलाई अर्को कम्पनीमा सारिएको भनियो । 

मेरी पीले तिनै ठूला कार्यालयमा सफा गरिरहिन् भने माथिल्लो पदमा रहेकाहरूले कम्पनीको नाफा कुम्ल्याइरहे । तर मेरी जस्ता न्यून आय भएका कर्मचारीको तलब पनि घट्यो, स्वास्थ्य सेवा सुविधा गायब भयो र सुरक्षित भन्ठानेको जागिर कुनै पनि बेलामा खुस्किने डर रह्यो । 

अनि अचानक कोरोनाभाइरस आइपुग्यो । 

‘उनीहरूले मलाइृ घर जाऊ भने । फेरि चाहिएमा बोलाउने उनीहरूले बताए । काम नगरेको पैसा मैले नपाउने रे । मेरो स्वास्थ्य बीमा यही अप्रिलको अन्तिमसम्मका लागि मात्र हो,’ वास्तविक नाम खुलाउन नचाहने मेरी पीले बताइन् । 

कोरोनाभाइरस १५ वर्षअघि आएको भए उनी आफूले सफाइ गर्ने कार्यालयका हाकिम जस्तै घरैमा बस्ने, तलब लिने र बिरामी हुँदा राम्रो स्वास्थ्य सेवा पाउने स्थितिमा हुन्थें होला भन्छिन् । तर अहिले उनी बेसहारा भएकी छन् । 

‘म फूड स्ट्याम्प्स र बेरोजगारी भत्ताका लागि निवेदन दिन त सक्छु तर त्यसले मेरो घरभाडा तिर्न पुग्दैन । म बिरामी भएँ भने के हुन्छ होला भनी डराउँछु । मैले घरैमा बस्नुपर्ने हुन्छ । डाक्टरलाई तिर्ने पैसा मसँग छैन,’ उनले भनिन् । 

लाखौं अमेरिकीहरूले बेरोजगारी भत्ताका लागि निवेदन दिएसँगै कोरोनभाइरस महाव्याधिले अमेरिकामा बढ्दै गएको असमानताका लागि कठोरताका साथ उजागर गरिदिएको छ । अतिधनाढ्य र अन्य व्यक्तिबीचको खाडल गहिरिँदै गएको छ । रोजगारीको स्तर र त्यससँगै आउने सामाजिक सुरक्षामा पनि ठूलो असमानता छ । 

वाशिङटनमा रहेको इकोनोमिक पोलिसी इन्स्टिच्युटमा वरिष्ठ अर्थशास्त्रीका रूपमा काम गर्ने एलिस गूल्डले भनिन्, ‘असमानता जागिरको मात्र कुरा हैन, तलबको मात्र कुरा हैन । यो त स्वास्थ्य र काम गर्ने वातावरण तथा स्वास्थ्य बीमाको समेत कुरा हो । यी सबैले यस देशमा दुई नितान्त भिन्न समाज छन् भन्ने देखाउँछ । असमानता बढेकाले झन् झन् बढी मानिस जोखिममा पर्न थालेका छन् ।’

महाव्याधिका कारण बेरोजगारीको समस्या ह्वात्तै बढेको अमेरिकामा मात्र हैन । तर अमेरिकी कामदारहरू विशेष जोखिममा छन् किनकि तिनीहरूलाई फ्रान्स वा जर्मनीमा जस्तो कल्याणकारी सुरक्षा व्यवस्था छैन अनि बेलायत र क्यानडामा जस्तो सार्वजनिक स्वास्थ्य सेवा पनि छैन । 

अर्को देशमा जागिर निर्यात गर्ने काम (आउटसोर्सिङ), कन्ट्य्राक्टमा काम गराउने र फ्रीलान्सर जागिरेहरूको वृद्धि भएपछि कामदारहरू अचानक आउने आर्थिक झड्काको शिकार बन्ने गरेका छन् ।