दक्षिण अमेरिकी देश चिलीमा कोरोनालाई हराउने मानिसहरूलाई भाइरस फ्री प्रमाणपत्र बाँडिने भएको छ । 

स्वास्थ्यमन्त्री हाइम मनालिचले भने, ‘यस्तो प्रमाणपत्र पाएका मानिसले स्वतन्त्रतापूर्वक हिँडडुल गर्न पाउनेछन् ।’ 

चिलीमा कोरोनाका कारण ५७ जनाको मृत्यु भएको छ भने १२ सय ७४ जना निको भएका छन् ।

मनालिचले चिलीमा अर्को हप्ता भाइरस केस अलिकतिले बढ्ने सम्भावना रहेको बताए । यस्तो अवस्थामा मानिसहरूलाई कोरोनाभाइरसविरुद्ध लड्नका लागि प्रोत्साहन गर्न सर्टिफिकेट दिन लागिएको उनको भनाइ छ । 

उनले भने, ‘कोरोनाबाट एकचोटि संक्रमित भएर ठीक भएको मानिसलाई पुनः संक्रमण हुँदैन किनकि उसको रोगप्रतिरोधक क्षमता बढिसकेको हुन्छ भन्ने कुराले हामीलाई आकर्षित गर्‍यो । यस्तो अवस्थामा निको भएकालाई प्रमाणपत्र दिँदा मानिसलाई हौसला मिल्छ ।’

तर स्वास्थ्यमन्त्रीको प्रस्तावलाई आधिकारिक समर्थन प्राप्त भइसकेको छैन । 

कोरोना संक्रमित ठीक भइसकेपछि फेरि संक्रमित हुँदैन भन्ने कुनै ग्यारेन्टी छैन । चीन र दक्षिण कोरियामा निको भइसकेको मानिसमा फेरि कोरोनाको लक्षण देखिएको छ ।

कोरोनाभाइरस लागेर निको भएका मानिसको संख्या मर्नेको भन्दा धेरै छ ।