ब्राजिल र भेनेजुएला सीमा क्षेत्रमा बस्ने यानोमामी समुदायको एक १५ वर्षीय किशोर कोरोना संक्रमित भएका छन् ।

स्वासप्रस्वासमा समस्या देखिएपछि उनलाई ब्राजिलको रोरिमा प्रदेशको एक अस्पताल भर्ना गरिएको थियो । परीक्षणका क्रममा ती किशोरलाई कोरोना संक्रमण भएको पत्ता लाग्यो ।

उनलाई गत अप्रिल ३ तारिखका दिन एकदमै गम्भीर अवस्थामा अस्पताल ल्याइएको थियो ।

अमेजनको दुर्गम क्षेत्रमा बस्ने आदिवासीमा कोरोना भाइरसको पहिलो केस देखिएको हो । ब्राजिलको ग्लोब नामको सञ्चारमाध्यमले यसको पुष्टि गरेको छ ।

यानोमामी समुदाय ब्राजिलकै ठूलो आदिवासी समूह रहेको बताइन्छ । उनीहरू करीब २ सय गाउँमा बस्ने गर्छन् र २३ लाख एकड जमिन ओगटेका छन् ।

उनीहरू ब्राजिलको सबैभन्दा दुर्गम मानिने क्षेत्रमा बस्छन् । तर कोरोना संक्रमण भेटिएको उक्त किशोर चाहिँ स्कूलबाट सिधै घर नगइ मुकाजी नदीको किनारमा पुगेपछि कुनै त्यहाँस्थित कसैको संसर्गबाट संक्रमण सरेको हुनसक्ने बताइएको छ ।

उक्त आदिवासी समूदायमा वृद्ध-वृद्धाको संख्या निकै ठूलो भएकाले संक्रमण फैलिहालेमा मृत्युदर निकै उच्च हुने अनुमान गरिएको छ । यदि त्यहाँ संक्रमण रोक्न नसकिएमा उनीहरूको स्थानीय शासनव्यवस्था मै खलल आउन सक्ने अन्तर्राष्ट्रिय विज्ञहरूले बताएका छन् ।

कोरोनाबाट जोगिन उनीहरूले शिकार गर्ने सामानहरूसहित सानो सानो समूह बनाइसकेका छन् । एक समूहबाट अर्को समूहमा फैलिन नदिन उनीहरू सचेत बनिरहेको स्थानीय सञ्चारमध्यमहरूले जनाएका छन् ।