दार्चुलाका क्वारेन्टाइनबाट स्वाब संकलन

प्रतिकात्मक तस्वीर

दार्चुलामा क्वारेन्टाइनमा बसेकाको स्वाब संकलन शुरू भएकोे छ ।

हेलिकप्टरमार्फत स्वास्थ्यकर्मी र औषधि आएपछि सो कार्य शुरू गरिएको हो । 


Advertisement

भारतलगायत विभिन्न देशबाट आएका नागरिकको स्वाब संकलन गरेर परीक्षण गर्न जिल्लाका ६ ठाउँबाट स्वाब संकलन शुरू गरिएको प्रमुख जिल्ला अधिकारी यदुनाथ पौडेलले जानकारी दिए । ६ ठाउँबाट ५०० भन्दा बढी व्यक्तिको स्वाब संकलन गरिँदैछ । ९ वटै स्थानीय तहमा भारत लगायतबाट आएका व्यक्तिको स्वाब संकलन गरी परीक्षण गरिने छ । 

स्वाब संकलन अपिहिमाल र मार्मा गाउँपालिकाको लटिनाथ, नौगाड गाउँपालिकाको दल्लेख, दुहुँ गाउँपालिकाको हिकिला र व्यास गाउँपालिकाको हुतीमा स्याब संकलन गरिँदैछ । 


Advertisement

मालिकार्जुन, लेकम गाउँपालिका र शैल्यशिखर नगरपालिकाको गोकुलेश्वर तथा महाकाली नगरपालिकाको खलंगामा स्वाब संकलन शुरू गरिएको उनले बताए ।

शनिवार शैल्यशिखरको गोकुलेश्वर र महाकाली नगरपालिकाको खलंगामा नेपाली सेनाको हेलिकप्टरमार्फत र मार्माको लटिनाथ, नौगाडको दल्लेख, दुहुँको हिकिला र हुतीका लागि कैलाश एयरको एमटी हेलिकप्टरमार्फत स्वास्थ्यकर्मी र औषधि आएको छ ।

‘सुदूरपश्चिमको अन्य जिल्लाको तुलनामा दार्चुलामा भारत लगायतका ठाउँबाट लकडाउनको समयमा पुल र महाकाली नदी तरेर आएका व्यक्ति धेरै भएको हुँदा बढी संख्यामा स्वाब परीक्षण गर्न लगाएका छौं,’ प्रजिअ पौडेलले भने, ‘अन्य जिल्लामा २/३ सय व्यक्तिको मात्रै परीक्षण गर्दैछ । सबै स्थानमा अहिले स्वाब संकलन भइरहेको जनाइएको छ ।’

यो क्षेत्रमा महाकाली नदीमार्फत पौडी खेलेर, तुइन तथा ट्युब तरेर समेत मजदुर घर फर्किएका छन् । जिल्ला प्रशासन कार्यालयका अनुसार भारत लगायतका ठाउँबाट जिल्लामा १ हजार ४०७ जना भित्रिएको तथ्यांक छ तर नदीबाट अवैध रुपमा भित्रिएका व्यक्तिको तथ्यांक भने समेटिएका छैन ।

जिल्लामा शुक्रवारसम्म २८० जना क्वारेन्टाइनमा बसेका छन् । शनिवार सबै क्षेत्रको स्वाब संकलन भइसक्ने जनाइएको छ । – नरेन्द्रसिंह कार्की/रासस

कमेन्ट गर्नुहोस्