प्रदेश २ मा कोरोनाभाइरस कोभिड– १९ को संक्रमण पाइएपछि परीक्षणमा तीव्रता दिइने भएको छ ।

प्रदेश सरकारको सामाजिक विकास मन्त्रालयका सचिव डा. रामप्रसाद घिमिरेका अनुसार प्रदेश २ मा ३ जनामा कोरोनाभाइरसको संक्रमण फेला परेपछि ८ वटै जिल्लामा परीक्षणका लागि दायरा बढाउने काम गरिएको हो ।

‘त्यसका लागि संघीय सरकारले प्रदेश २ का लागि कुल ५ हजार र्‍यापिड डाइग्नोस्टिक किट प्रदान गरेको छ,’ घिमिरेले भने, ‘उक्त किट प्रदेशका ८ वटै जिल्लामा पठाइसकिएको छ ।’

जिल्लाका स्वास्थ्य कार्यालयका प्राविधिकसहित स्वास्थ्यकर्मीको टोलीले प्रत्येक जिल्लामा तीव्र गतिमा कोरोना परीक्षण गर्ने बताए । 

पर्साको वीरगञ्ज महानगरपालिका वडा नम्बर २ छप्कैयास्थित एउटा मस्जिदमा रहेका २१ जना शंकास्पद व्यक्तिको नमूना लिइएको थियो । त्यसमध्ये ३ जना वर्ष ३७, ५५ र ४४ का पुरुषहरूलाई कोरोनाको संक्रमण पोजिटिभ देखिएको स्वास्थ्य तथा जनसंख्या मन्त्रालयले आफ्नो फेसबूक पेजमार्फत पुष्टि गरेका छन् ।

मन्त्रालयका प्रवक्ता विकास देवकोटाले समेत मिडिया ब्रिफिङमा उक्त कुराको पुष्टि गर्दै संक्रमित तीनै जनाको वीरगञ्जस्थित नारायणी अस्पतालको आइसोलेसनमा उपचार भइरहेको बताएका छन् ।

‘उहाँहरूको स्वास्थ्य अवस्था अहिले सामान्य नै छ,’ देवकोटाले भने, ‘उहाँहरूको सम्पर्कमा आएका व्यक्तिहरूको कन्ट्याक्ट ट्रेसिङका लागि काठमाडौंबाट टोली मुभ गरिसकेको छ ।’

सम्पर्क पहिचान गर्ने तथा अन्य कामहरू शुरू गरिसकेको उनले बताए ।