गोरखाको शहीद लखन गाउँपालिका–६ रानागाउँका ६० जना स्थानीयलाई रेबिज विरुद्धको भ्याक्सिन लगाउन शुरू गरिएको छ ।

स्थानीय खिलबहादुर थापाको कुकुरको टोकाइपछि रेबिज लागेर मृत्यु भएसँगै मृतकका परिवारसहित गाउँका अन्यलाई भ्याक्सिन लगाउन शुरू गरिएको गाउँपालिका स्वास्थ्य शाखाका प्रमुख बिरेन्द्र श्रेष्ठले जानकारी दिए ।

गत पुसमा कुकुरले टोकेको तर उपचारमा हेलचक्र्याइँ गरेका थापामा एक्कासी ज्वरो आउने र काम्ने समस्या देखिएपछि उपचारका लागि चैत २७ गते गोरखा अस्पताल पुर्‍याइएको थियो । त्यहाँ उपचार हुन नसकेपछि काठमाडौंको टेकु अस्पताल पठाइएको थियो ।

अस्पतालमा उपचारका क्रममा थापाको चैत २९ गते मृत्यु भएको थियो । ‘अस्पतालले थापाको मृत्यु रेबिजका कारण भएको पुष्टि गरेपछि मृतकका घरपरिवार र उहाँको सम्र्पकमा रहेका सबैको पहिचान गरी रेबिज विरुद्धको भ्याक्सिन लगाउन थालिएको हो,’ शाखा प्रमुख श्रेष्ठले भने, ‘पहिलो चरणमा चैत ३० गते ५२ जना र हिजो ८ जनालाई पहिलो चरणको भ्याक्सिन लगाइएको छ ।’

प्रमुख श्रेष्ठले टोलमा रेबिज रोग फैलन सक्ने जोखिमलाई ख्याल गरी थापाको परिवार, छरछिमेकी र मृत्यु संस्कारमा सहभागी सबैलाई भ्याक्सिन लगाउन शुरू गरिएको बताए । “उहाँहरू सबैलाई ३ चरणसम्म रेबिज विरुद्धको भ्याक्सिन लगाउनुपर्छ,’ उनले भने, ‘सबैलाई गाउँपालिकाको समन्वयमा निःशुल्करुपमा घरमै पुगेर भ्याक्सिन लगाउन शुरू गरिएको छ ।’

गोरखाको सिरानचोक गाउँपालिकामा पनि १ हप्ताअघि रेबिज लागेर १ पुरुषको मृत्यु भएपछि गाउँका ४० जनालाई रेबिज विरुद्धको भ्याक्सिन लगाउन थालिएको थियो ।