लामो समयदेखि एकीकरणको प्रक्रियामा रहेका राष्ट्रिय जनता पार्टी र समाजवादी पार्टी नेपालबीच अन्ततः एकीकरण गर्ने सहमति भएको छ ।

बुधवार राति अबेर दुवै पार्टीका नेताहरूले पार्टी एकीकरण गर्ने सहमति पत्रमा हस्ताक्षर गरेका छन् । सहमतिपत्रमा समानताको आधारमा पार्टी एकीकरण गर्ने उल्लेख छ ।

नेताहरूले एकीकृत पार्टीको नाम जनता समाजवादी पार्टी नेपाल राख्ने सहमति जनाएका छन् । सहमतिअनुसार एकीकृत पार्टीले समाजवादी पार्टीले प्रयोग गर्दै आएको झण्डा प्रयोग गर्नेछ भने चुनाव चिह्न चाहिँ राजपाले प्रयोग गरेको 'छाता' रहनेछ ।

मन्त्रिपरिषदले गत ल्याएको सोमवार पार्टी विभाजन खुकुलो पार्ने अध्यादेश राष्ट्रपतिबाट जारी भएर कानून बनिसकेको अवस्थामा दुवै दल पार्टी विभाजन हुने शंकाले त्रसित थिए ।

पार्टी फुट्ने अवस्था देखेपछि दुवै दलले हतारमा एकता गर्ने सहमति गरेका हुन् । 

सहमतिपत्रमा राजपाका तर्फबाट महन्थ ठाकुर, राजेन्द्र महतो, महेन्द्र राय यादव र शरत सिंह भण्डारीले हस्ताक्षर गरेका छन् भने समाजवादी पार्टीको तर्फबाट डाक्टर बाबुराम भट्टराई, उपेन्द्र यादव, अशोक राई र राजेन्द्र श्रेष्ठले हस्ताक्षर गरेका छन् ।  

यस्तो छ सहमतिपत्र -