नेपाली कांग्रेसका सभापति एवं पूर्व प्रधानमन्त्री शेरबहादुर देउवाले लोकतन्त्रमा मात्र सबैको अधिकार सुनिश्चित हुने भएकाले यसको रक्षार्थ सबैलाई सजग हुन आग्रह गरेका छन् ।

लोकतन्त्र दिवसका अवसरमा बिहीवार उनले एक सन्देश जारी गर्दै भने, ‘मुलुकमा लोकतन्त्रको स्थापना र पुनस्र्थापनाका लागि विगतमा गरिएका लोकतान्त्रिक आन्दोलनहरुमा आफ्नो प्राणको आहुती दिनुहुने सम्पूर्ण शहीदहरूको समर्पण, साहस र बलिदानको म स्मरण गर्दै उहाँहरूप्रति श्रद्धाञ्जलि अर्पण गर्दछु ।’

विक्रम संवत् २००७ अघिदेखि प्रारम्भ भएको संघर्षको पृष्ठभूमिमा निरंकुश राजतन्त्रको अन्त्य र पूर्ण लोकतन्त्र बहालीका लागि विक्रम संवत् २०६२/६३ मा राजनीतिक दलहरूद्वारा सञ्चालित ऐतिहासिक जनआन्दोलनले विक्रम संवत् २०६३ वैशाख ११ गते मुलुकमा एक युगान्तकारी परिवर्तन ल्याएको थियो । यो दिनलाई सबैले गौरवका साथ स्मरण गर्दै हरेक वर्ष लोकतन्त्र दिवसका रूपमा मनाउँदै आएका छन् ।

सभापति देउवाले वर्तमान सरकारले मुलुक कोरोना भाइरसका कारण लकडाउनको अवस्थामा रहेको बेला संवैधानिक परिषद् र राजनीतिक दलसम्बन्धी २ अध्यादेश ल्याएर संविधानको मूल मर्म र लोकतान्त्रिक मूल्य मान्यतालाई उल्लंघन गर्दै लोकतन्त्रलाई कमजोर पार्ने खेलमा उद्यत हुन थालेको आरोप लगाएका छन् ।

लोकतन्त्रलाई आघात पुर्‍याउने यस कार्यको सबैले भर्त्सना गर्नुपर्ने उल्लेख गर्दै उनले अध्यादेश तत्काल फिर्ता लिन पुनः आग्रह गरेका छन् ।

सभापति देउवाले सोही दिवसका अवसरमा वीर योद्धाहरूको साहस, संकल्प र बलिदानको धरोहरको रूपमा स्थापित लोकतन्त्रलाई कमजोर हुन नदिने प्रण गर्न सबैलाई आह्वान गरेका छन् ।