कोभिड–१९ को जोखिम हुन नदिन लकडाउन जारी रहँदा पनि भारतको पिथौरागढबाट पैदलयात्रा गरी १२ जना जुम्ला आइपुगेका छन् ।

हप्ता दिनको पैदलयात्रापछि हिमा गाउँपालिका–२ ओदीगाउँका ती स्थानीय जुम्ला आइपुगेका हुन् ।

रोजगारीका लागि उनीहरू ३ महिनाअघि पिथौंरागढ गएका थिए । हप्ता दिनको पैदलयात्रा गरेर यसै साता जुम्ला पुगेको गाउँपालिका अध्यक्ष रजबहादुर शाहीले जानकारी दिए ।

उनका अनुसार ती युवा भारतको पिथौंरागढ हुँदै दार्चुलाको झुलाघाट नाका भएर यहाँ आएको थिए । उनीहरू सीमापारि २१ दिन क्वारेन्टाइनमा बसेर फर्केका हुन् । उनीहरूलाई अहिले गाउँपालिका–२ ओदीगाउँको विद्यालयमा निर्माण गरिएको क्वारेन्टाइनमा राखिएको छ ।

वडाध्यक्ष नैनसिंह रोकायले भने, ‘भारतबाट आएको थाहा पाउनासाथ परिवारसँग घुलमिल नहुँदै उनीहरूलाई क्वारेन्टाइनमा राखेका छौं, पुनः क्वारेन्टाइन बसेको २१ दिन पुगेपछि कोरोना परीक्षण गरेर मात्रै घर पठाउने तयारी गरेका छौं ।’ बाहिरबाट आएका नागरिकलाई गाउँपालिकाले गाँसबासको व्यवस्थान गरी क्वारेन्टाइनमा राखेको छ ।

लकडाउन अवधिमा १० हजार ७६५ भित्रिएका छन् । ५२१ शय्याको क्वारेन्टाइनमा २३० जना बसेका छन् भने ८८० जना १४ दिनपछि घर फर्केको शुक्रवार जिल्ला प्रशासन कार्यालयले सार्वजनिक गरेको तथ्यांकमा उल्लेख छ ।

त्यसैगरी ५१६ होम क्वारेन्टाइनमा बसेका छन् । शुक्रवारसम्म ३७३ जनाको पीसीआर र २५४ जनाको आरडीटी परीक्षण भएको र सबैको रिपोर्ट नेगेटिभ रहेको जनस्वास्थ्य प्रमुख कृष्णप्रसाद सापकोटाले जानकारी दिए ।