अमेरिकाले कोरोनाभाइरस व्यवस्थापका सम्बन्धमा आफूमाथि २४ वटा व्यर्थ आरोप लगाएको भन्दै चीनले लामो खण्डन आलेख प्रकाशन गरेको छ । 

तीस पृष्ठ लामो अनि ११ हजार शब्दको उक्त लेख चीनको परराष्ट्र मन्त्रालयको वेबसाइटमा शनिवार पोस्ट गरिएको हो । चीनले प्रेस ब्रीफिङहरूमा गर्ने खण्डनलाई नै यसमा दोहोर्‍याइएको र विस्तार गरिएको छ । 

‘अमेरिकाका परराष्ट्रमन्त्री पम्पेओ, मन्त्रालयका प्रवक्ता र अन्यले अन्तर्वार्ताहरू दिइरहेका छन् र त्यसक्रममा कोभिड–१९ का सम्बन्धकमा चीनमाथि अनावश्यक आक्रमण गरिरहेका छन् । चीनले महाव्याधि रोक्न शीघ्र कदम नचालेको र सही आँकडा उपलब्ध नगराएको र उसलाई जवाफदेही बनाउनका लागि अनुसन्धान गर्न भनी अमेरिकाले आह्वान गरेको छ । हामीले आफ्नो अडान स्पष्ट पारिसकेका छौं । तर अमेरिकाले झूटहरू लगातार दोहोर्‍याइरहेको छ ।

संसारले तथ्यमार्फत सत्य देख्नका लागि हामीहरूले प्रयास गरिरहनुपर्छ,’ चीनको परराष्ट्र मन्त्रालयकी प्रवक्ता हुआ चुनयिङले बताइन् । 

आरोपका बारमा बोल्दै उनले भनिन्, ‘उनीहरूले चीनले तत्काल काम नगरेको दाबी गरे । कोभिड–१९ ले शुरूमै चीनलाई शुरूमै असर पारेको थियो । हामीहरूले महाव्याधि व्यवस्थापनमा गरेको कामको समयरेखा लगातार सार्वजनिक गरिरहेका छौं । उनीहरूले चीनको संक्रमित तथा मृतक संख्याको तथ्यपरकतामा प्रश्न उठाएका छन् । आफ्नो मृतक संख्या अन्य देशको भन्दा कम देखाउनका लागि कसैले झूट बोल्छ भनी सोच्नु मानसिक रोग हो । यो केटाकेटीको खेल हैन ।’

वुहानमा पुष्टि हुनुअघि अमेरिकीहरूलाई भाइरसको संक्रमण भइसकेको हो भन्ने समाचारलाई पनि चीनको आलेखमा उद्धृत गरिएको छ । तर यस विषयमा कुनै प्रमाण उसले प्रस्तुत गरेको छैन । 

अनि वुहानको प्रयोगशालामा भाइरस बनाइएको भन्ने आरोपको खण्डन गर्दै चीनले उक्त प्रयोगशालामा भाइरसलाई सिन्थेसाइज गर्ने क्षमता नरहेको र भाइरस मानिसले बनाएको हैन भनी पुष्टि गरिसकिएको बताएको छ ।