चीनले गत मार्च महिनामा गरेको निर्यातको मूल्य पोहोर सालको तुलनामा ८.५ प्रतिशतले बढेको देखिएको छ । विश्लेषकहरूले १२ प्रतिशत गिरावट आउने भनी अनुमान गरेको भए पनि त्यसो नभई वृद्धि नै भएको देखिन्छ । 

एसिया अझ विशेषगरी दक्षिणपूर्वी एसियामा निर्यात बलियो बनेपछि यो अनपेक्षित मजबूती देखिएको हो । 

मार्च महिनाको यो आँकडाले एसियाको आर्थिक एकीकरणमा क्रमिक वृद्धि भइरहेको देखाएको छ । अहिले एसियाली व्यापारको अधिकांश भाग एसियामै केन्द्रित देखिन्छ । 

अमेरिकाले चीनसँग सम्बन्ध विच्छेद गर्ने सोच बनाइरहेको बेलामा एसिया चाहिँ अमेरिकाबाट छुट्टिँदै गएको देखिन्छ । 

सन् २०१८ को अप्रिल महिनामा अमेरिका र चीनबीच प्रविधियुद्ध शुरू भएदेखि वाशिङटनले चीनको जेडटीई कर्पोरेसनलाई चिप निर्यातमा प्रतिबन्ध लगाएको थियो । तर त्यसयता आपूर्ति शृंखलामा अमेरिकाबाट मुक्ति नै सेमीकन्डक्टर उद्योगको मूल मन्त्र बन्न थालेको छ । 

ताइवान, भियतनाम, थाइल्यान्ड र इन्डोनेसियाले गत अप्रिल महिनामा पोहोरको अप्रिलभन्दा ५० प्रतिशत बढी चिनियाँ सामान खरिद गरे । जापान र कोरियाले २० प्रतिशत बढी कारोबार चीनसँग गरे । अनि अमेरिकामा गरिने निर्यात पनि बर्सेनि बढ्दो छ । 

एसियाका अन्य मुलुकबाट चीनमा हुने आयात पनि बढेको छ । 

एसियाली मुलुकहरूबीच व्यापारमा तीव्र वृद्धिले एसियाली अर्थतन्त्र पुनरुत्थान भएको देखाउँछ । अधिकांश एसियाली मुलुकहरूमा व्यापक परीक्षण, विद्युतीय निगरानी तथा सामाजिक एक्यबद्धताका कारण कोभिड–१९ को मृत्युदर १० लाख मानिसमा १० जनाको अनुपातमा मात्र रहेको छ । उता अमेरिका अनि युरोपका अधिकांश मुलुकमा त्यो अनुपात निकै माथि छ । 

चीनको उत्पादन अर्थतन्त्रको क्षमता अहिले ९० प्रतिशतभन्दा बढी छ । आपूर्ति शृंखला पुनः सुचारु हुँदा आयात र निर्यात दुवैमा वृद्धि भएमो हो । 

अमेरिकाबाट बाहिरको आपूर्ति शृंखलाले एसियाली व्यापारको वृद्धि भएको हुन सक्छ । जापानले अमेरिकालाई भन्दा चीनलाई बढी सेमीकन्डक्टर पठाउने गरेको छ । 

अमेरिकाले चीनको विशाल दूरसञ्चार संस्था हुआवेविरुद्ध पूर्ण प्रतिबन्ध लगाउन सक्ने सम्भावनालाई विचार गर्दै चीनले सेमीकन्डक्टर जम्मा पार्न थालेकोले पनि आयात बढेको हुन सक्छ । 

अमेरिकाले अप्ठ्यारो पार्न सक्ने भएकाले चीनका प्रविधि कम्पनीहरूले अमेरिकाको प्रभाव रहेको आपूर्ति शृंखलासँग पूर्णतया सम्बन्ध विच्छेद गर्ने सोच बनाएका छन् । त्यसका लागि चिनियाँ कम्पनीहरूले गैरअमेरिकी प्रविधि कम्पनीहरूसँग साझेदारी बनाउनुपर्ने हिनरिच फाउन्डेसनको प्रतिवेदनमा उल्लेख गरिएको छ ।

एसिया टाइम्सबाट