भारतबाट आएका थिए रौतहटका सातै जना संक्रमित

महिलामा भने स्थानीय संक्रमण

अजय अनुरागी
अजय अनुरागी

अजय अनुरागी लोकान्तरका लागि खोज, राजनीति र समसामयिक विषयवस्तुमा कलम चलाउँछन् ।

रौतहटमा सोमबार कुल ८ जनामा कोरोनाको नयाँ संक्रमण पाइएको छ । इशनाथ नगरपालिकामा २१,२१,२३,२५,२५,२९ र ३० बर्षका ७ जना पुरुषहरू तथा माधबनारायण नगरपालिकामा एक जना २८ बर्षीय महिला संक्रमित  पाइएको स्वास्थ्य तथा जनसंख्या मन्त्रालयले पुष्टि गरेको छ । 

ईशनाथ नगरपालिकाका नगर प्रमुख सन्तोष कुमार मेहताका अनुसार सोमवार संक्रमित भएका सातै जना मानिसहरू भारतबाट आएका छन् । ‘एक जना दिल्ली, एक जना कानपुर र बाँकी ५ जना मुम्बई बाट आएका हुन्,’ नगर प्रमुख मेहताले भने,‘भारतका बिभिन्न शहरबाट सीमा नाकामा आए पछि उहांहरू अलपत्र पर्नु भएको थियो, पछि हामीले नै समन्वय गरेर उहाँहरूलाई क्वारेनटाइनमा ल्याएका थियौं । ’ 


Advertisement

संक्रमित मानिसहरू आफ्नो घरमा भने नगएको उनले बताए । संक्रमित ब्यक्तिहरू अहिले क्वारेनटाइनमा नै छन । उनुहरूलाई उपचारका लागि गौर पठाउने तयारी भई रहेको उनले बताए । 

त्यसै गरी रौतहटको माधब नारायण नगरपालिका वडा नम्बर २ खेसरहिया गाउँका एक जना २८ बर्षीय महिलामा कोरोना संक्रमण पाइएको छ । उक्त वडाका वडाध्यक्ष हनुमान सहनी मलाहका अनुसार संक्रमित महिला आफैं बाहिर कतै ट्राभल गरेको हिस्ट्री छैन । तर, उनी आफ्नो बहिनीको घरमा बस्दै आएकी थिइन् । 


Advertisement

उनका बहिनी ज्वाइं (भिनाजु) केही दिन अगाडि भारतको गुजरात बाट आएका थिए ।  तर, गुजरात बाट आएका उनका भिनाजु तथा बहिनीमा भने कोरोना संक्रमण पाइएको छैन । 

‘उनीहरू आएको खबर पाए पछि म आफैं उनीहरूको घरमा पुगेर क्वारेनटाइनमा जान अनुरोध गर्दा घर परिवारका सबै मानिसहरूले उल्टै मसंग झगडा गरे पछि मलाई नै फिर्ता आउनु पर्यो,’ वडाध्यक्ष मलाहले भने,‘त्यस पछि प्रहरी गएर उनीहरूको परिवारका १२ जना सदस्यलाई वडा नम्बर ३ सखुअवा गाउँमा संचालित क्वारेनटाइनमा पठाइएको थियो ।’ महिलामा स्थानीय संक्रमण भएको हुन सक्ने उनले अनुमान गरे ।  

वडाध्यक्ष मलाहका अनुसार संक्रमित महिलाको २ वटा बच्चा पनि छन् । उनका श्रीमान कति बाहिर भारतमा रोजगारीका लागि गएका छन् । संक्रमित महिला ४ दिदी बहिनी छन् । उनीहरू सबै एकै ठाउँमा एकै घरमा बस्दै आएका थिए ।
 

अजय अनुरागी
अजय अनुरागी

लेखकबाट थप...

कमेन्ट गर्नुहोस्