धनुषाका ४५ वर्षीय संक्रमितको घर जनकपुरधाम उपमहानगरपालिका–५ मा घर छ भने वडा नम्बर ६ मा चामलको व्यापार गर्ने गरेका छन् । 

प्रादेशिक क्वारेन्टाइन गंगुलीका संयोजक सन्तोषकुमार ठाकुरका अनुसार उनी लकडाउन हुनुभन्दा केही दिनअघि मात्र भारतको हरियाणा गएका थिए ।

चामल किन्नका लागि उनी त्यहाँ पुगेपनि भारतमा समेत लकडाउन हुँदा उतै फसेका थिए । ४० दिनसम्म हरियाणामा एउटा होटलमा बसेका उनले नेपाल आउन जुक्ति निकाले ।

एक ट्रक चामल किनेर ट्रकमै बसेर उनी नेपाल–भारतको सीमा पर्ने महोत्तरीको भीठामोड नाकासम्म आएका थिए । भन्सारमा चामलको चेक जाँच भयो तर सुरक्षाकर्मीले चालकसहित ट्रकलाई मात्र जनकपुर आउन दियो । उनलाई ट्रकबाट ओरालेर भन्सारमै रोकियो ।

भारतीय सीमानामा रोकिएका उनी रातिको समयमा लुकीछिपी मरुवाही नाका हुँदै नेपाल छिरे । वैशाख ३१ गते नेपाल छिरेका उनी जनकपुर आएपछि १ दिन घरमा परिवारसहित बसेका थिए । स्थानीयले थाहा पाएपछि उनलाई क्वारेन्टाइनमा गएर बस्न भनियो । क्वारेन्टाइनमा स्वाब परीक्षण गर्दा ती व्यक्तिमा कोरोना संक्रमण पुष्टि भयो ।

अर्का संक्रमित २१ वर्षीय युवा जनकपुरधाम उपमहानगरपालिका–२१ कुर्था गाउँका हुन् । होली खेल्न भन्दै उनी आफ्नो मामा घर भारतको बिहारको बिहारी गाउँमा गएका थिए तर उनी पनि लकडाउनमा उतै फसेपछि धनुषाको जटही नाका हुँदै लुकीछिपी नेपाल भित्रिएका थिए ।

नेपाल भित्रिएर उनी पनि घरमा केही दिन बसेका थिए । गाउँका स्थानीय व्यक्तिले मामा घरबाट आएर लुकीछिपी बसेको थाहा पाएपछि उनलाई क्वारेन्टाइनमा पठाएका थिए ।

जेठ १ गते क्वारेन्टाइनमा आएका तथा २ गते स्वाब संकलनको काम गरिएको ठाकुरले बताए ।