औलो निको पार्न प्रयोग गरिने औषधि हाइड्रोक्सीक्लोरोक्विन कोरोनाभाइरसको उपचारमा काम लाग्दैन भनी वैज्ञानिकहरूले बारम्बार बताउने गरेका छन् । 

तर अमेरिकाका राष्ट्रपति डोनल्ड ट्रम्पलाई यसको मतलबै छैन । आफूले विगत १० दिनदेखि यसको चक्की खाइरहेको उनले बताएका छन् । 

अमेरिकाको फूड यान्ड ड्रग एडमिनिस्ट्रेसनले यो औषधि सुरक्षित नरहेको बताइसकेको छ । 

यो औषधि प्रयोग गर्न ह्वाइट हाउसका चिकित्सक सीन कोन्लीसँग सल्लाह गरेको ट्रम्पको भनाइ छ । शुरूमा त कोन्लीले ट्रम्पलाई तपाईंलाई कोरोना लागेकै छैन, किन औषधि खानुपर्‍यो भने अनि ट्रम्पले फेरि सोध्दा खाने भए खानू न त भने । ट्रम्पले त्यसपछि औषधि खान थाले । 

ट्रम्पले जिंकबाट बनेको यो औषधि दश दिनदेखि खाइरहेको र यसको बारेमा राम्रो कुरा सुनिरहेको बताए ।

सेन्ट जोसेफ विश्वविद्यालय अस्पतालका डा बब लाहिताले हाइड्रोक्सीक्लोरोक्विन औषधि खान मानिसहरूलाई निषेध गरिएको बताए । चिकित्सकको निगरानी विना यो औषधि खान नहुने र यसको असर कोरोनाभाइरस बिरामीलाई नदेखिने उनको भनाइ छ । 

ट्रम्पले यो औषधिका लागि किन यति धेरै हत्ते गरिरहेका हुन् भन्ने विषयको खुलासा द न्युयोर्क टाइम्सले गरेको छ । औषधि बेच्न पाए ट्रम्पलाई आर्थिक लाभ हुने अखबारको भनाइ छ । 

उसका अनुसार, हाइड्रोक्सीक्लोरोक्विनलाई संसारभरि कोरोनाभाइरसको उपचारका लागि अनुमति प्राप्त भएमा यो औषधि बनाउने कम्पनीलाई निकै फाइदा पुग्छ । यस्तै एक कम्पनीमा ट्रम्पको पनि शेयर छ । अनि उक्त कम्पनीका ठूला अधिकारीसँग ट्रम्पको गहिरो सम्बन्ध छ ।

फ्रान्सको सानोफी नामक कम्पनीमा ट्रम्पको शेयर छ । त्यसले हाइड्रोक्सीक्लोरोक्विनलाई प्लाकेनिल ब्रान्डको नामले बेच्ने गरेको छ ।