अमेरिकाका राष्ट्रपति डोनल्ड ट्रम्पले विश्व स्वास्थ्य संगठनबाट अमेरिका बाहिरिने धम्की मंगलवार दिएका छन् । उनले संगठनका महानिर्देशक टेड्रोस आधानोमको नेतृत्वमा संगठनले चीनको उक्साहटमा काम गरेको अनि आरम्भिक चरणमा कोभिड–१९ महाव्याधिको कुव्यवस्थापन गरेको आरोप लगाएका छन् । 

‘तपाईं र तपाईंको संगठनले महाव्याधिको व्यवस्थापनमा बारम्बार गल्ती गर्दा संसारलाई एकदमै महंगो परेको स्पष्ट छ । विश्व स्वास्थ्य संगठनको एक मात्र अग्रगामी बाटो भनेको चीनबाट स्वतन्त्र हुनु हो,’ ट्रम्पले टेड्रोसलाई लेखेको पत्रमा उल्लेख गरे । 

चार पृष्ठ लामो उक्त पत्रमा ट्रम्पले गत वर्षको डिसेम्बर महिनादेखि विश्व स्वास्थ्य संगठनले उपलब्ध सूचनाको आधारमा काम नगरेको, झुक्याउने किसिमको दाबीहरू गरेको र संसारलाई गलत सल्लाह दिएको फेहरिस्त लगाएका छन् । 

३० दिनभित्र ठोस सुधार गर्नका लागि प्रतिबद्ध हुन ट्रम्पले टेड्रोसलाई समय दिएका छन् । त्यसो नगरेमा ‘म संगठनलाई अमेरिकाले दिँदै आएको आर्थिक सहयोग रोक्नेछु र सदस्यता फिर्ता लिने विचार गर्नेछु’ भनी ट्रम्पले चेतावनी दिए । 

ट्रम्पको पत्रमा कस्तो किसिमको सुधारको अपेक्षा गरेका हुन् भन्ने स्पष्ट खुलाइएको छैन । ‘मेरो प्रशासनले तपाईंको संगठनको सुधार कसरी गर्न सकिन्छ भनी वार्ता थालिसकेको छ,’ उनले लेखे । 

वाशिङटन र जेनेभामा रहेका कूटनीतिज्ञहरूले विश्व स्वास्थ्य संगठनका प्रमुखलाई चेतावनी दिने ट्रम्पको पत्रले उक्त संगठनबाट अमेरिका बाहिरिने तयारीको संकेत दिएको बताएका छन् ।