संक्रमित युवाका परिवारको पीसीआर रिपोर्ट नेगेटिभ

कोरोना संक्रमित खोटाङका १ युवकका परिवारसहित ४३ जनाको पीसीआर रिपोर्ट नेगेटिभ आएको छ । 

काठमाडौंबाट गत वैशाख–१२ गते उद्धार गरेर ल्याइएका हलेसी तुवाचुङ नगरपालिका–७ महादेवस्थानका २० वर्षीय युवकलाई कोरोना संक्रमण पुष्टि भएपछि उनका ८ जना परिवार, उनीसँगै बसमा आएका व्यक्ति, स्वास्थ्यकर्मी, सुरक्षाकर्मी लगायतको स्वाब संकलन गरेर परीक्षण गर्न विराटनगर पठाइएकामा सबैको रिपोर्ट नेगेटिभ आएको हलेसी तुवाचुङ नगर प्रमुख इवन राईले जानकारी दिए ।


Advertisement

‘काठमाडौंबाट उद्धार गरेर ल्याइएकामध्ये ३३ जनाको स्वाब संकलन गरेर बीपी कोइराला स्वास्थ्य विज्ञान प्रतिष्ठान धरान पठाइएकामा एक युवकको पीसीआर रिपोर्ट पोजेटिभ आएको थियो,’ उनले भने, ‘१ जनाको रिपोर्ट पोजेटिभ आएसँगै अन्य व्यक्तिमा पनि कोरोना भाइरसको संक्रमण भए/नभएको यकिन गर्न संक्रमित युवकसँग प्रत्यक्ष वा अप्रत्यक्ष सम्पर्कमा पुगेका ४३ जनाको स्वाब संकलन गरेर परीक्षण गर्न पठाइएकामा सबैको रिपोर्ट नेगेटिभ आएको हो ।’

जिल्लामा १ युवकमा संक्रमण भेटिएपछि संक्रमित युवकसँग सम्पर्कमा पुगिसकेका अन्य व्यक्तिको पनि पहिचान गरेर पीसीआर परीक्षण गर्न कन्ट्याक्ट ट्रेसिङको काम भइरहेको प्रमुख जिल्ला अधिकारी शालिग्राम शर्मा पौडेलले बताए ।


Advertisement

बन्दाबन्दीको मारमा परेका स्थानीय वासिन्दालाई हलेसी नगरपालिकाले उद्धार गरेर गाउँ ल्याउने क्रममा राई थरका युवक बा४ख २२११ नम्बरको बसमार्फत गाउँ आएका थिए । सो बसमार्फत ५१ जना यात्रा गरेर जिल्ला आएकामा उनीसहित ३८ जना सोही नगरपालिका भित्रिएका वडाध्यक्ष चइन्द्र राईले जानकारी दिए ।

काठमाडौंस्थित पेप्सीकोला बसेर एक फाइनान्समा काम गर्दै आएका उनी होम क्वारेन्टाइनबाट निस्किएपछि गाउँकै आहाल निर्माण, खानेपानीको ट्यांकी सरसफाइ लगायतका सामाजिक काममा खटिएका थिए । आहाल खन्ने क्रममा १२ जना र ट्यांकी सफा गर्दा १५ जनाभन्दा बढी छिमेकीसँग उनको प्रत्यक्ष सम्पर्क भएको जनाइएको छ ।

कमेन्ट गर्नुहोस्