कोभिड १९ विशेष प्रादेशिक अस्पताल जनकपुरबाट एकजना संक्रमित शनिवार मध्यराति फरार भएका छन् । सर्लाही धनकौलका ४५ वर्षीय ती संक्रमित प्रहरीको आँखा छलेर शनिवार मध्यरातमा फरार भएका हुन् ।

अस्पतालका कोभिड १९ फोकल पर्सन डाक्टर कुलदीप पण्डितका अनुसार उनको १४ औं दिनको स्वाब संकलन गर्ने तयारी थियो । यसअघि पनि उनी आइसोलेसनबाट भागेका थिए । 

यसअघि भागेर रातभर गाउँ पुगेका उनलाइे फेरि ल्याइएको थियो ।  मानसिक समस्या भएका कारण उनलाई छुट्टै कोठामा राखिएको थियो । उनलाई मानसीक रोग विशेषज्ञले पनि उपचार गरिरहेका छन् । उनी गत वैशाख ३१ गते अस्पताल भर्ना भएका थिए ।

अस्पतालमा ७ जना प्रहरी खटिएका थिए । कोठामा रहेको सीसीटिभी क्यामेरा बटारेर फरार भएको अस्पताल स्रोतले बतायो । उनको खोजीकार्य तीव्र बनाइएको छ । 

जिल्ला प्रहरी कार्यालय सर्लाहीका प्रहरी उपरीक्षक विश्वमनी पोखरेलका अनुसार संक्रमित ब्यक्ती अहिलेसम्म गाउँ आएको खबर प्राप्त भएको छैन।

जनकपुरबाट भागेको खबर आए पनि गाउँ भने आई सकेका छैनन् ।

उनी बस्ने कोठाको ढोका बाहिरबाट लक भए पनि फुटाएर उनी भागेका छन्।

मानसिक सन्तुलन बिग्रेको अबस्थामा फरार भएका उनले बाहिरका मानिसमा जोखिम बढाएका छन् ।

जिल्ला प्रहरी कार्यालय धनुषाका प्रहरी नायब उपरीक्षक रामेश्वर कार्कीका अनुसार उनी तेस्रो पटक भागेको अनुसन्धानबाट खुलेको छ।

यस अघि उनलाई धनुषाको धनुषाधाम अस्पतालमा राखिएको थियो । उनी त्यहाँबाट पनि एक पटक र प्रदेश अस्पतालको आइसोलेसन बाट दुई पटक भागेको कार्कीले बताए ।

छिमेकी जिल्ला महोत्तरी र सर्लाहीमा समेत खोजतलाशका लागि पत्राचार गर्नुका साथै जिल्लाका सबै मातहत इकाईमा खोजतलाशका लागि निर्देशन दिएर खोज्ने क्रम जारी रहेको उनले बताए।