हिजो दिनभर : प्रधानमन्त्री ओलीले गरे राष्ट्रका नाममा सम्बोधन, नेपालमा कोरोनाले मृत्यु हुनेको संख्या ४ पुग्यो

राष्ट्रपति भण्डारीसमक्ष प्रधानमन्त्री ओलीले गरे प्रतिवेदन पेश
राष्ट्रपति विद्यादेवी भण्डारीसमक्ष प्रधानमन्त्री केपी शर्मा ओलीले नेपाल सरकार र सुरक्षा परिषद्को वार्षिक प्रतिवेदन पेश गरेका छन् ।

शीतल निवासस्थित राष्ट्रपति कार्यालयमा सोमवार आयोजित समारोहमा राष्ट्रपति भण्डारीसमक्ष प्रधानमन्त्री ओलीले आव २०७६/७७ को नेपाल सरकार र सुरक्षा परिषद्को वार्षिक प्रतिवेदन पेश गरेका हुन् ।


Advertisement

समारोहमा राष्ट्रपति भण्डारी, प्रधानमन्त्री ओली, उपप्रधान तथा रक्षामन्त्री ईश्वर पोखरेल, गृहमन्त्री रामबहादुर थापा र अर्थ, सञ्चार तथा सूचना प्रविधि मन्त्री डा. युवराज खतिवडा लगायतको उपस्थिति रहेको थियो ।

कोरोनाले मृत्यु हुनेको संख्या ४ पुग्यो


Advertisement

नेपालमा कोरोना भाइरस संक्रमणका कारण मृत्यु हुनेको संख्या ४ पुगेको छ ।

जेठ ४ गते मृत्यु भएका बाराका ७० वर्षीय पुरुषमा कोरोना संक्रमण देखिएपछि मृतकको संख्या ४ पुगेको हो ।

स्वास्थ्य तथा जनसंख्या मन्त्रालयका प्रवक्ता डा. विकास देवकोटाले ती व्यक्ति टीबीको आशंकामा जेठ २ गते अस्पताल भर्ना भएका थिए । शंकास्पद देखिएर कोरोना जाँच गर्दा पोजेटिभ देखिएको छ । मृतकको सम्पर्कमा आएका सबै व्यक्तिको जेठ ५ गते नै कोरोना परीक्षण भइसकेको प्रवक्ता देवकोटाले बताए ।

सोमवार दिउँसो थप ६ जनामा नयाँ संक्रमण देखिएको प्रवक्ता देवकोटाले बताए । सेती अस्पतालमा अछामका १ पुरुष, भेरी अस्पतालमा बर्दियाका ३ जना, नारायणी अस्पतालमा २ जना र काठमाडौं घर भएका बारा कलैयाका १ जनामा कोरोना संक्रमण पुष्टि भएको छ । 

जनसंख्याको २ प्रतिशतमा कोरोना परीक्षण गर्ने लक्ष्य छ : प्रधानमन्त्री ओली

प्रधानमन्त्री केपी शर्मा ओलीले देशका कम्तिमा २ प्रतिशत नागरिकको कोरोना परीक्षण गर्ने रणनीति रहेको बताएका छन् ।

कोरोना परीक्षणलाई तीव्र बनाइएको बताउँदै प्रधानमन्त्री ओलीले कम्तिमा २ प्रतिशतको कोरोना परीक्षण गर्ने रणनीति रहेको बताएका हुन् ।

नेपाल टेलिभिजनमार्फत देशवासीका नाममा सम्बोधन गर्दै प्रधानमन्त्री ओलीले भने- 'औषधि र स्वास्थ्य खरिदमा भएका अलमल कोभिड- १९ को परीक्षणलाई तीव्र बनाइएको छ । औषधिको प्रबन्ध द्रूत गतिमा गरिनेछ । कम्तिमा जनसंख्याको २ प्रतिशतसम्म परीक्षण गर्ने योजनामा सरकार छ ।'

२ महिनाको शिशुदेखि ८१ वर्षको वृद्धसम्मलाई कोरोना निको हुनुलाई सफलता मान्नुपर्ने प्रधानमन्त्री ओलीले बताए ।

आवश्यकताअनुसार बन्द होटल र सार्वजनिक संरचनालाई क्वारेन्टाइन बनाउने गरी प्रबन्ध गरिने पनि उनले बताए ।

महामारी बिस्तार भएको ठाउँलाई सील गरी युद्धस्तरमा परीक्षणको काम अघि बढाउने र सबै सरकारी निकायहरूलाई चुस्त एवं प्रभावकारी बनाउने प्रधानमन्त्री ओलीले बताए ।

प्रधानमन्त्री केपी शर्मा ओलीले कोभिड– १९ का कारण अलपत्र परेका नागरिकको उद्धार गर्ने प्रतिबद्धता जनाएका छन् ।

यसबारे सरकारले तत्काल आदेश जारी गर्ने उनले बताए ।

सोमवार साँझ राष्ट्रका नाममा सम्बोधन गर्दै ओलीले सरकार आफ्ना नागरिकप्रति संवेदनशील रहेको बताएका छन् ।

प्रधामनन्त्री ओलीले सीमा पार गर्नुअघि  घर फर्किनेको अनिवार्य परीक्षण नगर्दा महामारी फैलिएको स्वीकारे ।

उनले भारतबाट फर्कीनेहरू परीक्षणविना नै फर्किँदा महामारी फैलिनमा मद्दत पुगेको बताए ।

स्वदेश फर्केकालाई छिटोभन्दा छिटो परीक्षण गराउन पनि उनले आग्रह गरे ।

एक वर्षसम्म बैठक भत्ता नलिने नारायणकाजीको घोषणा, भन्छन्- सांसद विकास काेष खारेज गराैँ

सत्तासिन नेपाल कम्युनिस्ट पार्टी नेकपाका प्रवक्ता नारायणकाजी श्रेष्ठले  एक  वर्षको राष्ट्रियसभा र समितिको बैठक भत्ता नलिने घोषणा गरेका छन्।

मुलुक काभिड-१९ बाट प्रभावित बनेको र आगामी वर्ष आर्थिक क्षेत्रमा ठूलो चुनौतिको सामना गर्नुपर्ने देखिएका बेला  नेकपा सचिवालय सदस्य समेत रहेका श्रेष्ठले यस्तो घोषणा गरेका हुन्।  

‘यसका लागि सार्वजनिक खर्चमा कटौती, मितव्ययीता,चुहावट र भ्रष्टाचार नियन्त्रण, प्राथमिकताको निर्धारण र पुँजीगत खर्च कार्यान्वयन क्षमतामा बृद्धि जरुरी हुन्छ,’ सोमबार साँझ ट्वीट गर्दै उनले भनेका छन्, ‘यस सन्दर्भमा म १ वर्षको राष्ट्रियसभा र समितिको बैठक भत्ता नलिने घोषणा गर्दछु। संघ र प्रदेशका अन्य मित्रहरुलाई पनि सोच्न अनुरोध छ।’

उनले सांसद विकास कोष भनिने स्थानीय विकास साझेदार कार्यक्रम कम्तिमा आगामी वर्षका लागि खारेज गर्न पनि माग गरेका छन्। उक्त रकम रोजगारी केन्द्रित राष्ट्रिय योजनामा लगानी गर्नुपर्ने उनको भनाइ छ। 
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्