गृहमन्त्री रामबहादुर थापा बादलले रुकुम पश्चिमको चौरजहारीमा अन्तरजातीय विवाहका लागि केटी लिन गएका दलित युवामाथि भएको दुव्र्यवहारमा संलग्नमाथि कारवाही गर्ने प्रतिबद्धता जनाएका छन् ।

घटना छानबिनका लागि गृह मन्त्रालयका सह–सचिवको संयोजकत्वमा ५ सदस्यीय छानबिन समिति गठन गरिएको उनले जानकारी गराए ।

मंगलवार बसेको राष्ट्रिय सभा बैठकमा समय लिएर बोल्दै गृहमन्त्री थापाले हत्यामा संलग्न केटीपक्षका १२ जना प्रहरीको नियन्त्रणमा रहेको जानकारी गराए । 

गत जेठ १० गते प्रेमिकालाई विवाहका लागि लिन आएका जाजरकोटको भेरी नगरपालिकाका नवराज विक र उनको समूहमा रहेका युवालाई रुकुम चौरजहारीका स्थानीयले ढुंगामुढा गरेपछि ज्यान जोगाउन भेरी नदीमा हामफाल्दा ३ युवाको मृत्यु भएको थियो । 

वडाध्यक्ष डम्बरबहादुर मल्लको संलग्नताबारे सांदहरूले गृहमन्त्रीसँग जवाफ मागेका थिए । मन्त्री थापाले वडाध्यक्षलाई नियन्त्रणमा लिइएको र दोषी पाइए कारवाही गर्ने बताए ।

‘कानूनको परिपालन गर्ने शिलशिलामा कानूनको उल्लंघन गर्ने जोसुकै हो, त्यो जनप्रतिनिधि होस् या तिनीहरूमाथि कानूनबमोजिम करवाही हुन्छ, वडाध्यक्षलाई नियन्त्रणमा लिइएको छ,’ मन्त्री थापाले भने ।

त्यसअघि राष्ट्रिय सभा बैठकको शून्य समयमा बोल्ने सांसदहरूले रुकुमपश्चिम र जाजरकोटमा भएको घटनामा संलग्नलाई कारवाहीको माग गर्दै गृहमन्त्रीको जवाफ माग गरेका थिए । 

‘दुई जनाको प्रेम सम्बन्ध पुरानै भन्ने बुझिएको छ, घटना सल्टाउन विगतमा पनि पटक–पटक कुरा भएको हाम्रो अनुसन्धानमा देखिन आएको छ,’ मन्त्री थापाले भने, ‘त्यो दिन केटा पक्षका १९ जना युवक केटीलाई लिन गएका थिए भन्ने आएको छ । सल्लाहले भन्दा पनि केटीलाई भगाएर लिन आएको कुरा आएको छ ।’