नेपालमा टेलिफोन प्रयोगको घनत्व १ सय ३९ प्रतिशत पुगेको छ। यस्तै इन्टरनेट उपभोक्ताको घनत्व ७५ प्रतिशत पुगेको छ।

सरकारले मंगलबार जारी गरेको आर्थिक वर्ष २०७६/०७७ को आर्थिक सर्वेक्षणमा उल्लेख भए अनुसार गत फागुन महिनासम्म मोबाइल फोन प्रयोगकर्ताको संख्या ४ करोड ७ लाख ९३ हजार १ सय २ पुगेको छ। 

नेपालको कुल जनसंख्याको ७५ प्रतिशत जनसंख्यामा इनटनेटको पहँुच पुगेको आर्थिक सर्वेक्षणले देखाएको छ। इन्टरनेट प्रयोगकर्तामध्ये ४८ दशमलव ९ प्रतिशत ग्राहक नेपाल दूरसञ्चार कम्पनी (टेलिकम)का छन। ३२ दशमलव ८ प्रतिशतले एनसेलको इन्टरनेट प्रयोग गरिरहेका छन्।  

प्रतिनिधिसभामा आर्थिक वर्ष २०७६/०७७ को आर्थिक सर्वेक्षण पेश गर्दै अर्थमन्त्री डा. युवराज खतिवडाले चालु आर्थिक वर्षमा नेपालको आर्थिक वृद्धिदर २ दशमलव ३ प्रतिशतमा सीमित रहने बताए। 

फागुनसम्मको आर्थिक क्रियाकलापमा बृद्धि भए पनि कोरोना भाइरसका कारण विश्व अर्थतन्त्र प्रभावित भएका कारण चालु आवमा आर्थिक वृद्धिदर २ दशमलव ३ प्रतिशत हुने प्रारम्भिक अनुमान रहेको बताएका हुन्।