विश्वव्यापी महामारीको रुपमा फैलिएको कोरोना भाइरस (कोभिड १९) का कारण मृत्यु हुनेको संख्या अमेरिकामा एक लाख नाघेको छ ।

नेपाली समय अनुसार बुधवार बिहानसम्म कोरोनाका कारण अमेरिकामा मृत्यु हुनेको संख्या १ लाख ५ सय ७२ पुगेको हो । अमेरिकामा संक्रमितको संख्या १७ लाख २५ हजार २ सय ७५ पुगेको छ । 

शुरुमा चाइना भाइरस भन्दै कोरोनाविरुद्ध हल्का टिप्पणी गरेका अमेरिकी राष्ट्रपति डोनाल्ड ट्रम्पले कोरोनाका कारण अमेरिकामा १ लाखको मृत्यु हुनसक्ने भन्दै चेतावनी दिएका थिए । विश्वमा कोरोना भाइरस संक्रमितको संख्या ५६ लाख ८४ हजार ७ सय ९५ पुगेको छ । 

कोरोनाका कारण बुधवारसम्म विश्वमा ३ लाख ५२ हजार २ सय २५ जनाले ज्यान गुमाइसकेका छन । संक्रमित मध्ये २४ लाख ३० हजार ५ सय ९३ जना निको भएर घर फर्केका छन । 

अमेरिका पछि संक्रमितको संख्या ब्राजिलमा धेरै देखिएको छ । ३ लाख ९४ हजारमा संक्रमण देखिएको छ भने रुसमा ३ लाख ६२ हजारमा संक्रमण देखिएको छ । 

नेपालको दक्षिणी छिमेकी देश भारतमा संmत्रमितकोसंख्या १ लाख ५० हजार नाघेको छ । संक्रमितको संख्या धेरै भएको देशको रुपमा भारत दशौं स्थानमा छ । भारतमा ४ हजार ३ सयको मृत्यु भएको छ । संक्रमितको संख्यामा चीन १४ औं स्थानमा छ ।

सन् २०१९ मा चीनको वुहानबाट शुरु भएको कोरोनाका कारण झण्डै दुइ महिना देखि विश्वका अधिकाशं मुलुक लकडाउनमा छन । वैज्ञानिकहरुले कोरोना भाइरसविरुद्धको खोप बताउन भरमग्दुर प्रयास गरिरहेका छन । अमेरिका, बेलायत र चीनका वैज्ञानिकले कोरोनाविरुद्धको खोप परीक्षणलाई तीब्र बनाएका छन ।