प्रमुख प्रतिपक्षी दल नेपाली कांग्रेसका सांसद एवं पूर्वमन्त्री डा. मीनेन्द्र रिजालले बालुवाटारमा हुने सर्वदलीय बैठकका निर्णय प्रधानमन्त्री या संसदीय व्यवस्था मन्त्रीले संसदमा दिने चलन प्रारम्भ गर्न माग गरेका छन् ।

बुधवार बसेको प्रतिनिधि सभा बैठकको शून्य समयमा सांसद रिजालले संक्रमणकाल सकिएर राजनीतिक स्थायीत्व कायम भइसकेकोले यस्तो चलन चलाएमा संसदीय सार्वभौमिकता कायम रहने बताए ।

‘प्रधानमन्त्रीज्युले हिजो बोलाउनु भएको सर्वदलीय बैठकले संविधान संशोधन प्रस्ताव सबै दलको सहमतिमा छिटो पारित गर्ने निर्णय भएको सुन्यौं,’ उनले भने, ‘खुसी लाग्यो, हाम्रो कर्तव्य पनि हो । अहिलेसम्म यस्ता बैठकको निष्कर्ष नेताले सम्बन्धित दललाई दिने थियो । डाक्टर रिजालले भने, ‘अब हामी राजनीतिक संक्रमणमा छैनौं, संविधान सम्मत राजनीतिक अभ्यास र परम्परा स्थापित गर्दैछौं । यस्ता बैठक, विशेषत संसदीय गतिविधिसँग सम्बन्धित बैठकका निष्कर्ष सरकारको तर्फबाट प्रधानमन्त्री या संसदीय मन्त्रीले दिने परम्परा शुरू गरौँ ।’

उनले यसो गर्नाले छलफल र निष्कर्ष प्रत्यक्ष प्रसारणमार्फत र संसदीय अभिलेखमार्फत आज र चीर कालसम्म नागरिकको जानकारीका रहने बताए । ‘संसदीय उत्तरदायित्व सुनिश्चित हुनेछ, संसदको मर्म र भाव यही हो संसदीय सार्वभौमिकता पनि यही हो,’ उनले भने ।

रिजालले संसदीय उत्तरदायित्वको लागि यो व्यवस्था शुरु गर्न सभामुख र प्रधानमन्त्रीको ध्यानाकर्षण गराए । ‘सभामुख महोदय र प्रधानमन्त्रीज्यूलाई नम्रतापूर्वक तर गम्भीर रुपमा यो चलन आरम्भ गर्न अनुरोध चाहन्छु,’ उनले भने ।