सत्तासिन नेपाल कम्युनिस्ट पार्टी (नेकपा) का स्थायी कमिटी सदस्य जनार्दन शर्माले गत शनिबार रुकुम पश्चिमको चौरजहारीमा भएको घटनाको छानबिनमा सहयोग गर्न प्रतिवद्ध रहेको बताएका छन्। आफ्नो गृहजिल्लामा भएको उक्त घटनाको सत्यतथ्य छानबिन गरी दोषीमाथि कडा कारबाही गर्न पनि उनले माग गरेका छन्।

यसअघि संसदमा धारणा राख्दा कतिपयबाट आलोचना खेपेका शर्माले बुधबार विज्ञप्ति जारी गरेर प्रष्टिकरण पनि दिएका छन्। घटनाबारे विवरण राख्दै गर्दा केही सांसदले होहल्ला गरी भनाइ राख्न अवरोध भएको र त्यसकारण सम्पूर्ण भनाइ राख्नबाट बञ्चित भएको उनले बताएका छन्। शर्माले घटनाको सत्यतथ्य सार्वजनिक होस् भनि छानबिनको माग गरेकोमा भनाइलाई तोडमोड री तथ्यलाई बंग्याउने प्रयत्न भैरहेको विज्ञप्तिमार्फत बताएका छन्।

‘मैले बोलेको स्पष्ट भनाइ हुँदाहुँदै तोडमोड गरी राजनीतिकरण गर्ने प्रयास भएको छ। सबैमा आग्रह गर्न चाहन्छु कि घटनाको सत्य तथ्य सार्वजनिक होस् भनि छानबिनको माग गरेको तथ्यलाई बंग्याउने काम भएको छ,’ उनले भनेका छन्।

भेरी नगरपालिका–४ जाजरकोटका नवराज विक गत शनिबार रुकुम पश्चिम चौरजहारी सोती गाउँकी मल्ल थरकी एक युवतीलाई विवाह गर्न भन्दै लिन पुग्दा हत्या भएको थियो। उनीसहित ४ जनाको शव भेरी नदीमा भेटिएको छ। बुधबार मात्रै लोकेन्द्र सुनारको शव फेला परेको छ। 

यसअघि नवराजसहित गणेश बुढामगर र चौरहजारी नगरपालिका-१ टीकाराम सुनारको शव फेला परिसकेको छ। घटनामा भेरी नगरपालिका ११ का १८ वर्षीय सञ्जु (सन्दीप) विक र १७ वर्षीय गोविन्द शाही अझै वेपत्ता छन्।