संसदमा विनोद चौधरी : हामी विरोधी हौंला शत्रु होइनौं, बजेटले संशोधन खोजेको छ

नेपाली कांग्रेसका सांसद एवं नेपालका प्रतिष्ठित उद्यमी विनोद चौधरीले कोरोना संकटका कारण उत्पन्न समस्याबाट उत्पन्न तत्कालका समस्या सम्बोधनका लागि बजेटले संशोधन खोजेको बताएका छन् ।

उनले बजारमा उत्पादन र सप्लाइको चेनलाई निरन्तता दिन नसके सामाजिक द्वन्द र लूटपाटको स्थिती आउने खतरा औंल्याए ।


Advertisement

प्रतिनिधि सभामा बोल्दै चौधरीले भने - ‘बजेटको मुख्य आधार नै हाइट आफ अप्टिमिजम हो भन्छु, अप्टिमिजम कुन अर्थमा भने चालू आर्थिक वर्षमा लगभग ८ खर्ब राजश्व उठाउन गइरहेका छौं । जबकी १० महिनासम्म बजार अर्थतन्त्र चलायमान थियो ।’

आर्थिक वर्ष २०७७/०७८ को राजश्व र व्ययको वार्षिक अनुमान (बजेट) माथिको सामान्य छलफलमा भाग लिँदै सांसद चौधरीले भने, ‘अब आउने वर्ष त्यो भन्दा बढी १० खर्बको राजश्वको प्रक्षेपण गर्दैछौं, यो बजेटको माध्यमबाट । साउन १ गतेदेखि स्थिती काभिड अगाडिको अवस्थामा गयो भने यति पैसा उठ्न नसक्ने निश्चित छ ।’


Advertisement

नेपालमा कोरोनको संक्रमण बढ्दै गइरहेकोप्रति गम्भीर बन्दै उनले धरातल नबिर्सन आग्रह गरे । ‘आशावादी हुनुपर्छ, स्वप्नदर्शी हुनुपर्छ, त्यसको धरातललाई बिर्सनुहुँदैन । अहिले दूर्भाग्यवश संक्रमण बढ्दो छ, बोर्डरबाट आइरहेका छन् र एयरपोर्टबाट पनि आउनेछन्,’ उनले भने, ‘संक्रमणको आकार बढ्नेवाला छ । बजार अहिलेसम्म चल्न सकेको छैन अहिलेको आवश्यकता भनेको सर्भाइभ गर्नु हो ।

उनले रेमिटे्न्स सुक्दै जानाले बजारमा तरलता अभाव हुने बताए । ‘एकप्रकारको अर्थतन्त्रको साइकल त्यसले क्रिएट गरेका डिमान्ड र त्यसका लागि भएको आयात त्यसबाट जन्मिएको राजश्वले मुलुकको खर्च धानिरहेको स्थिती थियो,’ उनले भने, ‘आउने दिन अत्यन्त कठीन हुनेवाला छ । आगामी दिनमा आधाभन्दा बढी रेमिट्यान्स सुक्नेवाला छ । रेमिट्यान्स घटदा, त्यसको पहिलो प्रभाव उनीहरुको खल्ती र प्रभाव बजारमा पर्नेवाला छ ।’

चौधरीले अगाडि भने, ‘बेरोजगार, सानातिना काम गर्ने, बिहान बेलुका मेहनत गरेर काम गरेर हातमुख जोर्ने, तीनको खल्ती सुकिसक्यो । उद्योग बन्द छन, ठूलो ऋण लिएर बन्दै गरेका हाइडो र सिमेन्ट उद्योगका प्रोजेक्ट साइड बन्द छन । होटल, स्कुल, मल, रियलस्टेट सबै बन्द छन् । चालू छ भने केवल व्याज र बत्तीको मिटर र बन्दको अवस्थामा पनि तिर्नुपर्ने वेज(ज्याला)को मिटर ।’

चौधरीले आफूहरुले २ सय ५० अर्बको राहात प्याकेज ल्याउन कांग्रेसको तर्फबाट संस्थागत सुझाव दिएपनि १ सय अर्बको रि-फाइनान्सिङको कुरा बजेटमा आएको र त्यसले सबै सम्बोधन गर्न नसक्ने बताए ।

‘हामी जिम्मेवार पृष्ठभूमिबाट कुरा राख्ने गरेका छौ, हामीले जहिले पनि यो कुरा राख्दा रचनात्मक इनपुट दिने काम हो, हाम्रो काम हो । हुनसक्छ हामी विरोधी हौला शत्रु होइनौ । अहिलेको तत्कालको आवश्यकता भनेको २ सय ५० अर्बको राहत घोषणा होस् भनेका थियौं,’ चौधरीले भने, ‘सय अर्बको रिफाइनिन्सङ प्याकेजले साना र घरेलु तथा पर्यटान क्षेत्रलाई राहत दिने भनिएको छ । यातायात, शिक्षा समावेश छैनन, ठूला प्रोजेक्ट छैनन् । यी समावेश नभएका सेक्टरहरु यदि धरासायी बने भने त्यसको प्रभाव बैंकिङ क्षेत्रमा पर्ने कुरा निश्चित छ ।’

व्यापारको चक्रलाई निरन्तर कायम राख्न नसकेमा भोलिको दिनमा सामाजिक द्वन्द् निम्तिन सक्नेतर्फ उनले सचेत गराए ।

‘रोजगारीको क्षेत्रमा कुरा गर्दा परम्परागत रुपमा चलिआएका बजार बन्द छन्, अझै यातायात सुचारु रुपले चलाउन सकेका छैनौं । उत्पादन भपनि बजारमा पुर्याउन नसक्दा कृषि उत्पादन कुहिएर बसेको छ । यदि हामीले यो सप्लाइ चेनलाई निरन्तर बजार र उत्पादन आयातित वस्तु नै किन नहोस् व्यापार र सप्लाइलाई निरन्तर राख्न सकेनौं भने भोलिको दिनमा सामाजिक द्वन्द लूटपाटको स्थिती आयो भनेपनि आश्यर्च मान्नु पर्ने छैन,’ उनले भने ।

चौधरीले बेरोजगारी समाधान गर्न कृषिलाई आधार बनाउनु सकारात्मक रहेको भन्दै बेरोजगारलाई तालिम र तालिमलाई पूजीसँग जोड्ने काम गर्न सरकारलाई सुझाव दिए ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्