गाउँ-गाउँका क्वारेन्टीनमा पुगेर मनोबल बढाउन प्रशिक्षण दिँदै पूर्वराजदूत पौड्याल

कार्यकाल पूरा नहुँदै फिर्ता बोलाइएको चीनका लागि नेपाली पूर्व राजदूत एवं पूर्व मुख्यसचिव लीलामणि पौड्याल भारतबाट आएर क्वारेन्टीनमा बसेका नागरिकको मनोबल बढाउन प्रशिक्षण दिँदै हिडेका छन् । गुल्मीको रुरुक्षेत्र गाउँपालिका वडा नम्बर ४ का स्थायी बासिन्दा पौड्याल २ हप्तादेखि गाउँमा खटिएका छन् । 

रुरुक्षेत्र गाउँपालिकाको कोरोना नियन्त्रण व्यवस्थापन कमिटीका सदस्य एवं स्थानीय समाजसेवी नारायण पौड्यालका अनुसार पूर्वराजदूत पौड्यालले क्वारेन्टीनमा बसेकाहरूलाई आत्मबल बलियो बनाउन प्रशिक्षण दिँदै हिँडेका छन् ।


Advertisement

‘हिजो ग्वादीमा रहेको क्वारेन्टीनमा रहेकालाई उच्च मनोबल कायम राख्न प्रशिक्षण दिनुभयो, उहाँ गाउँमा सक्रिय हुनुनुन्छ,’ नारायणले लोकान्तरसँग भने, ‘आज थोर्गामा रहेको क्वारेन्टीनमा जाने तयारी गर्नुभएको छ । छत्रकोट गाउँपालिकाको मानकोटमा पनि आइदिनुपर्‍यो भन्ने माग भएको छ ।’ 

पौड्यालले क्वारेन्टीनमा रहेकाहरूलाई आत्मबल बलियो बनाउने, योग र हास्ने कला सिकाएका थिए ।


Advertisement

‘उहाँले गाउँपालिकालाई ठूलो गुन लगाउनु भएको छ, चाइनाको पनि अनुभव भएकाले कसरी सुरक्षित हुन सकिन्छ भनेर क्वारेन्टीनमा बसेकालाई आत्मबल दिइरहनुभएको छ । हामी गाउँपालिकाका तर्फबाट धेरै धन्यवाद दिन्छौं,’ गाउँपालिका उपाध्यक्ष लक्ष्मीदेवी पन्थले भनिन् । 

केहीदिन पहिले भारतबाट आएका एकजनाले गुल्मीकै आदर्श मावि दिगाममा रहेको क्वारेन्टीनमा आत्महत्या गरेपछि चिन्तित बनेकालाई सान्त्वना दिन पौडेलले विभिन्न क्वारेन्टीनमा गएर प्रशिक्षण दिइरहेका छन् । पूर्वराजदूत पौड्यालले कोरोना नियन्त्रणमा चीनको अनुभवबारे उनीहरूलाई जानकारी गराएका थिए ।

व्यवस्थापनमा दिनरात नभनी खटिएका छौं : उपाध्यक्ष पन्थ

रुरु गाउँपालिकामा भारतबाट आएका २ सय ५६ जना क्वारेन्टीनमा बसिरहेका छन् । गाउँपालिका उपाध्यक्ष लक्ष्मीदेवी पन्थले क्वारेन्टीनमा खाने, बस्ने व्यवस्था र सुरक्षाको राम्रो प्रबन्ध गरिएको लोकान्तरलाई बताइन् ।
उपाध्यक्ष पन्थले भारत लयागत विदेशबाट फर्किने एक हजार जनाका लागि खानाको अनुमान गरिएको बताइन् ।

‘अहिलेसम्म तीनवटा बस र एउटा जिपमा भारतबाट फर्किएकाको उद्धार गरेर क्वारेन्टीनमा राखेका छौं,’ उनले भनिन्, ‘भारतलगायत विदेशबाट फर्किन चाहनेको संख्या संकलन गरिरहेका छौं, सोहीअनुसार क्वारेन्टीनको व्यवस्थापन गर्दैछौं ।’ 

उनीहरूलाई सुनौली, नेपालगञ्ज, कपिलवस्तुको कृष्णनगर नाकाबाट उद्धार गरेर ल्याइएको हो । विदेशबाट फर्किनेलाई अब नेपाली सेनाले नै सम्बन्धित गाउँपालिकासम्म पुर्‍याउने व्यवस्था गर्न लागेकाले गाउँपालिकाले क्वारेन्टाइनको व्यवस्थापनमै ध्यान केन्द्रित गरेको छ । 

पहिलो चरणमा उच्चमावि, मावि हुँदै निमावी र प्राविमा क्वारेन्टीनको व्यवस्थान गरिएको उनले बताइन् ।

उपाध्यक्ष पन्थका अनुसार क्वारेन्टीनमा बस्नेका लागि बिहान बेलुका दाल, भात, तरकारी र अचार तथा दिउँसोमा चिया बिस्कुटलगायत खानको व्यवस्था गरिएको छ । उनीहरूलाई नियमित रूपमा तातोपानी उपलब्ध गराइएको छ । 

राहात वितरण गर्दै गाउँपालिका उपाध्यक्ष पन्थ

‘न्युनतम आवश्यक पूर्वाधारको अभावमा देशका विभिन्न भागमा क्वारेन्टीनबाट भागेका घटना सुनिएका छन्, हामी क्वारेन्टीनको व्यवस्थापनमा एकदमै सचेत छौं,’ उनले भनिन् ।

आर्थिक अवस्था कमजोर भएका विपन्न वर्गलाई राहत वितरण गरिएको पनि उनले बताइन् ।

कोभिड– १९ बाट कसरी बच्ने भन्ने विषयमा गाउँमा जनचेतना फैलाउने काम पनि भइरहेको उनले बताइन् ।

क्वारेन्टीन  व्यवस्थापनका लागि राजनीतिक दल, क्लब, समूह र व्यक्तिहरूले पनि सहयोग गरिरहेका छन् । 

पौड्यालका अनुसार बलेटक्सारको ज्ञवा माविमा १७ जना क्वारेन्टीनमा बसेका छन् । श्रीगेश्वर क्याम्पसमा ४१ जना तथा गाउँपालिकाको सभा हलमा १७ जना र काउले बोटेगाउँमा १६ जना क्वारेन्टीनमा बसेका छन् ।

ग्वादीमा २६ जना र खोर्गाको ओखलढुंगामा २२ जना क्वारेन्टीनमा बसिरहेका छन् । क्वारेन्टीनमा बसेकामध्ये ६ जनाको परीक्षण गराउँदा रिपोर्ट नेगेटिभ आएपछि उनीहरू घर फर्केका छन् । 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्