चीनले भारतलाई दियो चेतावनी– दुई देशको सम्बन्ध खराब नबनाऊ

हतारमा निर्णय लिएर दुई देशबीचको सम्बन्ध नबिगार्न चीनले भारतलाई चेतावनी दिएको छ । 

चीनले यो चेतावनी जी७ समूहमा संलग्न हुने सन्दर्भमा दिएको हो । जी७ समूहको अंग बन्दा भारतलाई कुनै फाइदा नहुने किनकि त्यस समूहका देशले चीनलाई काल्पनिक शत्रु मानेर काम गरिरहेको चीनको भनाइ छ । 


Advertisement

जी७ संसारका आर्थिक महाशक्ति मुलुकहरूको समूह हो । त्यसमा अमेरिका, बेलायत, क्यानडा, फ्रान्स, जर्मनी, इटली र जापान छन् । अमेरिकाका राष्ट्रपति डोनल्ड ट्रम्पले यसलाई विस्तार गरेर भारत, रुस, दक्षिण कोरिया र अस्ट्रेलियालाई पनि समावेश गर्न खोजेका छन् । 

ट्रम्पले भारतका प्रधानमन्त्री नरेन्द्र मोदीलाई फोन गरेर जी७ मा आउन निमन्त्रणा दिएका थिए र मोदीले त्यसलाई स्वीकार गरेका छन् । 


Advertisement

त्यसपछि चिनियाँ कम्युनिस्ट पार्टीको मुखपत्र ग्लोबल टाइम्सले जी७ को विस्तार गर्ने प्रस्ताव भूराजनीतिक समीकरणलाई लिएर गरिएको र चीनलाई रोक्ने स्पष्ट प्रयास भएको लेख्यो । त्यसै पनि अमेरिकाले भारतलाई इन्डो प्यासिफिक रणनीतिमा समावेश गरेर चीनको प्रभाव क्षीण बनाउने प्रयास गरिरहेको छ । 

ग्लोबल टाइम्सले सम्पादकीयमा लेखेको छ, ‘ट्रम्पको योजनामा भारतले उत्साह देखाउनु आश्चर्यजनक छ । शक्तिको महत्त्वाकांक्षाका कारण भारत लामो समयदेखि संसारका शीर्ष अन्तर्राष्ट्रिय संगठनहरूको सदस्य बन्न लालायित छ । अहिले चीनसँग उसको सीमा विवाद चलिरहँदा ऊ अमेरिकाको जी७ विस्तार योजनामा समर्थन गरेर चीनलाई सन्देश दिन चाहिरहेको छ ।’

सम्पादकीयमा थप लेखिएको छ, ‘भारतका रणनीतिकार र नीतिनिर्माताको सानो समूहले चीनविरोधी सोच राख्छ । चीनको उदय र भारत–चीनबीच शक्तिको विशाल अन्तरले पनि भारतलाई चीनप्रति सशंकित बनाएको छ ।’

तर चीनलाई काल्पनिक शत्रु मान्ने साना समूहसँग हात मिलाउन भारतले हतार गरेमा चीनसँग उसको सम्बन्ध बिग्रने र भारतको हितमा नहुने सम्पादकीयले चेतावनी दिएको छ ।

एजेन्सी
एजेन्सी

लेखकबाट थप...

कमेन्ट गर्नुहोस्