कैलालीको गौरीगंगा नगरपालिका–९ ले क्वारेन्टीनमा रहेकालाई मानसिक तनाव हुन नदिन मनोपरामर्श दिन शुरूआत गरेको छ । 

क्वारेन्टीनमा रहँदा मनमा विभिन्न कुरा खेलिरहँदा मानसिकरूपमा तनाव पैदा हुनसक्ने र यसले दीर्घकालीनरूपमा समेत असर पुर्‍याउने अवस्थालाई ध्यान दिँदै मनोपरामर्शको शुरूआत गरिएको वडाध्यक्ष अध्यक्ष हरिप्रसाद तिवारीले जानकारी दिए ।

‘हामीले वडामा रहेका ३ वटै क्वारेन्टीनमा परामर्श दिन शुरू गरेका छौं । यसले गर्दा क्वारेन्टीनमा बस्नुभएकाहरूमा थोरै भए पनि ऊर्जा थपिएको छ,’ उनी भन्छन् । स्थानीय युवाहरू क्वारेन्टीन व्यवस्थापनदेखि जोखिम हुन नदिन वडासँगै हातेमाले गरेर गाउँगाउँमा चेतना फैलाउनसमेत लागिरहेको उनले बताए ।

‘क्वारेन्टीनस्थलमा बसिरहँदा आफूलाई कोरोना नै भएको छ । लकडाउनका कारण रोजगारी गुमाएर बसिरहेको हुनाले परिवारमा आर्थिक बोझ आउँछ, लगायतका कुरा सोचेर तनाव लिएर बसेकालाई आत्मबल बढाउन मद्दत पुर्‍याउने हेतुले परामर्श दिइएको हो,’  मनोविर्मशकर्ता सीता भण्डारीले भनिन् ।
 
उनले तनाव व्यवस्थापन गर्न सामाजिक सञ्जालमा आएका अपूर्ण र अविश्वसनीय समाचारहरू हेर्न र सुन्न बन्द गर्न, शारीरिक व्यायाम तथा ध्यान गर्न, स्वस्थ र सन्तुलित भोजन गर्न, धुमपान र मद्यपानबाट टाढै रहन, पर्याप्त मात्रामा सुत्ने, आफूलाई मनपर्ने र ऊर्जाशील क्रियाकलापमा समयको सदुपयोग गर्न साथीभाइ तथा आफ्नो नजिकको मान्छेहरूको निरन्तर सम्पर्कमा बस्न आग्रह समेत गरे ।

गौरीगंगा नगरपालिकाका प्रमुख भीम देउवाले नगरपालिकाका हरेक क्वारेन्टीनमा मनोपरामर्श सञ्चालन गरिने जानकारी दिए । उनले संकटको घडीमा एकले अर्कालाई मद्दत गर्न आग्रह समेत गरे ।