संखुवासभाको खाँदबारीमा रहेको सरकारी खाद्य व्यवस्था तथा व्यापार कम्पनी लिमिटेडको डिपोमा चामल अभाव भएको छ ।

जिल्लाभरको खाद्यान्न संकट समाधानका लागि स्थापना भएको सो शाखाको डिपोमा गत वैशाख महिनादेखि चामल सकिएको हो । 

डिपोले लकडाउनको समयमा विपन्न जनतालाई चामल वितरण गर्न सकेको छैन । १ महिना अघिदेखि चामल सकिएको शाखा कार्यालय खाँदबारीका सूचना अधिकारी रामप्रवेश मण्डलले जानकारी दिए । विपद् र जिल्ला कारागारका लागि राखिएको २०० क्विन्टल चामल मात्र डिपोमा रहेको उनको भनाइ छ ।

दैनिक ३ हजार ५०० केजी चामल बिक्री गर्ने  डिपोमा चामल नआएकाले डिपो बन्द गरेर बस्नुपर्ने बाध्यता भएको डिपो कार्यालयले जनाएको छ । लकडाउनको समयमा खाद्यले चामल नदिएपछि महंगो मूल्यको चामल किन्न बाध्य भएको खाँदबारी नगरपालिका–१ की स्थानीय विष्णु राई गुनासो गरे ।

जिल्लामा आएको चामल १ महिनाअघि नै सकिएको र थप चामल नआउँदा विपन्न जनताको मागअनुसार चामल बिक्री गर्न नसकिएको सूचना अधिकारी मण्डलले बताए । स्थानीयको काम बढी भएकाले चामल मागअनुसार नआउँदा समस्या भएको हो । खाँदबारी नगरपालिकाले राहत वितरणका लागि ३२० क्विन्टल चामल माग गरे पनि खाद्यले चामल दिन नसकेको उनले जानकारी दिए ।

जिल्लाका व्यापारीले लकडाउनको मौका छोपेर दैनिक उपभोग्य वस्तुमा मूल्य बढाएका छन् । व्यापारीले १ बोरा चामलमा २०० देखि ३०० सम्म मूल्य बढाएको स्थानीयले बताएका छन् । अहिले चामल सहितको खाद्यवस्तुको मूल्यसमेत बढाएकाले मारमा परेको खाँदबारी–९ का रमेश मगरले बताए ।

खाद्यले बिक्री गर्ने चामल व्यापारीसँग किन्दा किलोमा १० देखि १५ रुपैयाँसम्म महंगो परेको उनको भनाइ छ । लकडाउन र बर्खा लागेको भन्दै व्यापारीले दैनिक उपभोग्य वस्तुको मूल्य बढाए पनि अहिलेसम्म बजार अनुगमन भएको छैन ।

लकडाउले दैनिक रोजगारी जान पनि समस्या भएको र पारिश्रमिक पनि समयमा नपाएका बेला अझ महंगो चामल किनेर खानुपरेको राईको गुनासो छ । लकडाउनको सयमा खाद्यले आपूर्ति व्यवस्थालाई सहज बनाउन नसक्दा विपन्न परिवार महंगो मूल्यको चामल खान बाध्य छन् । यसअघि खाद्य व्यवस्था तथा व्यापार कम्पनी लिमिटेडले सोना मन्सुली प्रतिकेजी ३८.२५ र जापनिज प्रतिकेजी चामल ४३.२० रुपैयाँका दरले बिक्री गर्दै आएको थियो ।