नेपाली कांग्रेसका युवा नेता एवं सांसद गगन थापाले राष्ट्रपति शैक्षिक सुधार कार्यक्रम संविधान र संघीयताविरोधी भएको आरोप लगाएका छन् । यसले राष्ट्रपतिलाई श्री ६ बनाउने उनले टिप्पणी गरे । 

विनियोजन विधेयक अन्तर्गत शिक्षा मन्त्रालयका लागि विनियोजित शीर्षकको खर्च कटौती प्रस्ताव आइतवार प्रतिनिधि सभा बैठकमा पेश गर्दै सांसद थापाले शिक्षा मन्त्रालयको बजेट सांसदले टिप्पणी गर्ने हैसियतको नभएको बताएका हुन् । 

‘प्रत्येक संकटसँग अवसर जोडिएर आएको हुन्छ, स्वास्थ्य र शिक्षामा यस्तै अनुमान लगाइएको थियो । स्वास्थ्यले त निराश बनायो नै, शिक्षा मन्त्रालयको बजेटले झनै निराश बनायो । शिक्षा मन्त्रालयको जे जस्तो बजेट कार्यक्रम आएको छ, वास्तवमा सांसदको टिप्पणीको योग्यता र हैसियत राख्दैन,’ नेता थापाले भने, ‘शिक्षा मन्त्री आफैं गनगन आफैं गर्दै हिँड्नुभएको छ, अर्थमन्त्रीले मेरो कुरा सुन्नुभएन भनेर । अर्थमन्त्रीले मेरो कुरा सुन्दिनु भएन भनेर गनगन गरिरहेका माननीय शिक्षामन्त्रीलाई प्रश्न छ, सम्माननीय राष्ट्रपतिलाई श्री ६ बनाउने रहर चाहिँ किन पलायो ?’

राष्ट्रपति शैक्षिक सुधार कार्यक्रम संविधानको भावनाविपरीत भएको थापाले जिकिर गरे ।

‘राष्ट्रपति शैक्षिक सुधार कार्यक्रम भनेर राजाले हिजो बक्सिस मारेको जस्तो, राष्ट्रपतिले खुट्टा टेकेको ठाउँमा पैसा दिन पाउने कार्यक्रम संघीयता, संविधानविरोधी छ । गएको वर्ष ५ अर्बको ठाउँमा अहिले ६ अर्ब बनाउने ?’ उनले प्रश्न गरे ।  

शिक्षा मन्त्रालयलाई ९० लाख विद्यार्थी विद्यालय नगएको कुरा बजेटमा थाहा नहुनु उदेकलाग्दो भएको उनले टिप्पणी गरे ।