नेपाल मजदूर किसान पार्टीका सांसद प्रेम सुवालले सरकारलाई सियो बनाएर जनतालाई देखाउने चुनौती दिएका छन् ।

उनले नेपालजस्तै सानो भूभाग र जनसंख्या भएको देश उत्तर कोरियाले हाइड्रोजन बम बनाएर शत्रुलाई तर्साइरहेका बेला नेपालमा भने सियोसमेत बन्न नसकेको भन्दै सरकारमाथि कटाक्ष गरेका हुन् ।

आइतवार प्रतिनिधिसभामा राष्ट्र ऋण उठाउने विधेयक २०७७ का बारेमा छलफलका क्रममा अर्थमन्त्री युवराज खतिवडालाई प्रश्न गर्दै सुवालले सियो बनाएर देखाउन सरकारलाई चुनौती दिएका हुन् ।

'नेपाल जस्तै सानो देश उत्तर कोरियाले हाइड्रोजन बम बनाएर शत्रुलाई तर्साइरहेको छ,' उनले भने, 'यहाँ चाहिँ सियो नबनाउने । हामीले सियो कहिले बन्छ भनेर धेरैपटक सोध्यौं । बिस्तारै बन्छ भन्छन् । यस्तो पनि हुन्छ ?'

उनले अबदेखि विदेशबाट ऋण लिन्नौं भन्ने कुरा विधेयकको दफामा राख्नुपर्ने बताए । 'अबदेखि वैदेशिक ऋण लिन्नौं भन्न सक्नुपर्यो,' उनले भने, 'विदेशमा रहेका नेपाली दूतावासमार्फत अब नेपालले वैदेशिक ऋण लिन्न भन्न लगाउनुपर्यो । नेपाली जनताको थाप्लोमा वैदेशिक ऋण कहिलेसम्म बढाइरहने ?'