भारतसँग वार्ता गर्न उपयुक्त समयको पर्खाइमा सरकार, मन्त्री ज्ञवाली भन्छन् – उत्तेजित बन्ने प्रयास नगरौं

सरकारले सीमा समस्या समाधानको विषयमा भारतसँग सम्पर्कमा रहेको र वार्ताबाटै समस्याको समाधान गर्न सकिने विश्वास व्यक्त गरेको छ ।

सोमवार बसेको राष्ट्रिय सभा बैठकमा अध्यक्षसँग समय लिएर परराष्ट्रमन्त्री प्रदीप ज्ञवालीले सीमा समस्याको समाधान गरेर मात्र दुई देशबीच विश्वासमा आधारित सम्बन्ध स्थापित गर्न सकिने विश्वासमा सरकार रहेको बताएका हुन् ।


Advertisement

‘मित्रराष्ट भारतसँग हामी सम्पर्कमै छौं, नेपाल सरकार यो समस्याको कूटनीतिक वार्तामार्फत हुन्छ गर्नुपर्छ, र गर्न सकिन्छ भन्ने तीन कुरामा विश्वस्त छ । मान्यता विश्वास र बाटो तीनवटै कुरामा सरकारमा द्विविधा छैन,’ नेपाली कांग्रेसका सांसद प्रकाश पन्थको एक प्रश्नको जवाफमा मन्त्री ज्ञवालीले भने, ‘कहिलेकाहीँ समय लाग्छ, हामी उपयुक्त समयको पर्खाइमा पनि छौ ।'

उनले बिनाकुनै आवेग बिनाकुनै उत्तेजना कहिलेकाहीँ बाहिर कहिलेकाहीँ विभिन्न कोणबाट वातवरण उत्तेजित बनाउने प्रयास हुने र ती कुराबाट प्रभावित हुन नहुने बताए । 'यो एउटा समस्या हिजोदेखि नै रहेको यता उताको सरकारले भन्दापनि इतिहासले गाठो नफुकाइदिएर कसेको विषय हो, जो हाम्रो काँधमा आइपरेको छ र समाधान गर्न सकिन्छ र गर्नुपर्छ । विश्वासमा आधारित घनिष्ठ सम्बन्ध स्थापित गर्न सकिन्छ ।’


Advertisement

मन्त्री ज्ञवालीले वातावरणलाई तिक्त बनाउने काम नगर्न आग्रह गरे । ‘यो समस्याले समग्र आयामलाई अन्यत्र प्रभाव पार्नहुँदैन, नेपालको तर्फबाट दुई देशबीचको सम्बन्धका अन्य बहुआयाममा प्रभाव नपारोस् भन्नेमा सरकार विश्वस्त छ । सबैले योगदान गर्नुपर्ने आवश्यकता छ । वातावरण चर्काउन, तिक्त बनाउन र भ्रम फैलाउन सजिलो हुन्छ,’ मन्त्री ज्ञवालीले भने ।

मन्त्री ज्ञवालीले उत्तरी छिमेकी चीनसँग सीमामा समस्या नभएको स्पष्ट पारेका छन् । सगरमाथाको उचाइको यकिन गर्नेबाहेक सीमा विवाद नरहेको उनले बताए ।

चीनतफ सीमा विवाद रहेको भन्ने समाचार आएपछि मन्त्री ज्ञवालीले सदनमा सरकारको तर्फबाट जवाफ दिएका हुन् ।

 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्