पोखरामा ७ जना संक्रमित थप, महानगरमा समुदायस्तरमा फैलिएको छैन कोरोना : पौडेल

विजय उत्सव
विजय उत्सव

पत्रकार विजय उत्सव लोकान्तरका गण्डकी प्रदेश प्रतिनिधि हुन् ।

पोखरा महानगरपालिकामा ७ जना नयाँ कोरोना संक्रमित थपिएका छन् ।

प्रदेश स्वास्थ्य निर्देशनालयले मंगलवार विज्ञप्ति जारी गरी संक्रमित थपिएको पुष्टि गरेको हो । 


Advertisement

संक्रमितमध्ये २७ वर्षीया महिला छन् भने ३० वर्षीय २ जना र ३५, ३६, ३९ र ५३ वर्षीय १/१ जना पुरुष छन् ।

यससँगै पोखरा महानगरपालिकाभर कोरोना संक्रमितको संख्या ३९ पुगेको छ ।


Advertisement

महानगर स्वास्थ्य महाशाखा प्रमुख हेमन्त शर्मा पौडेलले महानगरभित्र समुदायस्तरमा अझैसम्म कोरोना नफैलिएको र जोखिम न्यूनीकरणका लागि आफूहरूले क्वारेन्टीन व्यवस्थित गर्नेदेखि कन्ट्याक्ट टे«सिङको कार्यलाई निरन्तरता दिएको बताए ।

उनका अनुसार हालसम्म १५ जना निको भई घर फर्केका छन् भने बाँकीले पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पतालको आइसोलेसन वार्डमा उपचार गराइरहेका छन् ।

बाहिरबाट आएका सम्भावित कोरोना संक्रमितको आशंकामा क्वारेन्टीनमा राखिने हुँदा यसलाई सबैले स्वाभाविक लिनुपर्ने उनको तर्क छ तर क्वारेन्टीन व्यवस्थित बनाउने विषयमा आफूहरूले स्वास्थ्य मन्त्रालय तथा डब्ल्यूएचओले भने अनुसार फरक–फरक मितिमा आउनेलाई छुट्टै कोठामा आवश्यक प्रबन्ध मिलाएर राख्ने गरिएको पौडेलले बताए ।

‘पोखरामा समुदायस्तरमा कोरोना नफैलिनु नै हाम्रो लागि सुखद पक्ष हो,’ उनी भन्छन्, ‘तैपनि आगामी दिनमा सबैजनाले सचेतना अपनाउनुपर्छ ।’

पोखरासहित समग्र गण्डकी प्रदेशमा मंगलवारसम्म कोरोना संक्रमितको संख्या ९६६ पुगेको छ । मंगलवार कास्की, तनहुँ, लमजुङ र स्याङ्जामा गरी थप १७ नयाँ संक्रमित थपिएका हुन् । कास्कीको मादी गाउँपालिकाका ४२ वर्षीय पुरुष संक्रमित बनेका छन् ।

तनहुँमा थपिएका ५ जना व्यास नगरपालिकाका हुन् । संक्रमितहरू २०, २७ र ३२ वर्षीय पुरुष र २७ र ३६ वर्षीया महिला छन् ।

लमजुङको वेशीशहरकी १९ वर्षीया, मस्र्याङ्दीकी ३८ वर्षीया र मध्यनेपाल नगरपालिकाकी २० वर्षीया महिलामा कोरोना देखिएको छ ।

स्याङ्जाको पुतलीबजारका ३० वर्षीय पुरुषमा पनि कोरोना भाइरस पुष्टि भएको स्वास्थ्य निर्देशनालयले जनाएको छ । 

प्रदेश स्वास्थ्य निर्देशनालयका निर्देशक डा. विनोदविन्दु शर्माका अनुसार गण्डकीबाट हालसम्म कोरोना संक्रमणबाट निको हुने २१४ जना पुगेका छन् । 

विजय उत्सव
विजय उत्सव

लेखकबाट थप...

कमेन्ट गर्नुहोस्