काठमाडौं महानगरपालिकामा घर तथा भवन निर्माणका लागि नक्सा पास अब अनलाइनबाट नै गर्न सकिने भएको छ ।

महानगरवासीको सहजताका लागि अनलाइन सेवा सञ्चालनमा ल्याउन लागिएको महानगरपालिकाका प्रमुख प्रशासकिय अधिकृत एकनारायण अर्यालले लोकान्तरलाई जानकारी दिए । 

तयारी सबै पूरा भएको बताउँदै उनले अबको एक हप्ताभित्रमा अनलाइन सेवा परीक्षण गर्ने जानकारी दिए । उनले भने,‘हामीले महानगरवासीको सहजताका लागि अनलाइन सेवा सञ्चालनमा ल्याउन लागेका हौं, अबको एक हप्ताभित्रमा परीक्षण शुरू गर्छौं ।’

महानगरपालिकाका भवन निर्माण इजाजत विभागका प्रमुख सुरज शाक्यले नक्सा पास कार्यलाई ‘पेपरलेस’ बनाउन लागिएको बताए । उनले अब महानगरवासीले नक्सा पास गर्दा महानगरसम्म आउन नपर्ने बताउँदै छिट्टै यसको परीक्षण गरिने बताए । उनले भने,‘हामीले अबको एक साताभित्रै परीक्षण शुरू गर्छौं, सम्भव भएसम्म स्रावन १ गतेदेखि नै सेवा सञ्चालनमा ल्याउँछौं ।’ 

शाक्यका अनुसार, भवन निर्माणका लागि जग्गा धनीले अनलाइनमा राखिएको फारम भर्नुपर्नेछ र ‘डिजिटल सिग्नेचर’ गर्नुपर्नेछ । त्यसपछि नविल बैंक वा महानगरमा दस्तुर बुझाउनुपर्नेछ । 

फारम भरेर पठाएको ३० दिन अर्थात एक महिनाभित्रमा प्रक्रिया सबै पूरा गरी महानगरले मोबाइलमा म्यासेज पठाउँछ । जसमा नक्सा पास भएको जानकारी दिइएको हुन्छ ।

यदि नक्सा पास नभएमा म्यासेज आउँदैन, सेवाग्राहीले आफैं वेबसाइटमा गई विवरण चेकजाँच गर्नूपर्ने हुन्छ । 

महानगरले गत वर्षको बजेटमार्फत नक्सा पास कार्यलाई पेपरलेस बनाउने घोषणा गरेको थियो । सोही योजनाअनुरुप गत बैशाखदेखि सेवा सञ्चालनमा ल्याइने भनिएपनि कोरोना भाइरसले निम्त्याएको महामारीका कारण समय धकेलिएको शाक्यले बताए । उ

नी भन्छन्,‘अब काम शुरू भइसक्यो परीक्षणकार्य छिट्टै सकेर सेवा सञ्चालनमा ल्याउँछौं ।’