नेपाल चीन मामिलाका जानकार स्वतन्त्र विश्लेषक डा. राजीव झाले कोरोनाका कारण देश संकटमा परेको बेलामा नेपालमा सरकार परिवर्तन या राजनीतिक अस्थिरता निम्त्याउने कुनै गतिविधि गर्न नहुने बताएका छन्। उनले पावर शेयरिङ गरेर नेकपाभित्रको विवाद टुंगाउन सम्बन्धित पक्षलाई सुझाव दिए।

‘सरकारबाट कमी कमजोरी भएका हुनसक्छन, तर यसको समीक्षा कोरोना संकट सकिएपछि गर्दा पनि हुन्छ’ डा झाले भने ‘शीर्ष नेतामा भएका असमझदारी अन्त्य गरेर जानुमा नै नेकपा र नेपालको भविष्य उज्वल छ । अहिले बिवाद गरेर बस्ने समय होइन ।’

डा झाले पुष्पकमल दाहाल प्रचण्ड, माधवकुमार नेपाल र वामदेव गौतमलाई सम्मानजनक हुनेगरी शक्ति सन्तुलन गरेर अगाडि बढेमा नेकपा भित्रको विबादले निकाश पाउने विश्वास व्यक्त गरे । 

‘यो पावर शेयरिङको विषय पनि हो । विगतमा भएको समझदारी अनुसार प्रचण्डलाई कार्यकारी अधिकार र अन्य नेतालाई सम्मानजनक स्थान दिएर विबाद समाधान गर्नु उपयुक्त हुन्छ’ डा झाले भने । 

मंगलवारको नेकपा स्थायी कमिटी बैठकमा अध्यक्ष प्रचण्डले अर्का अध्यक्ष केपी शर्मा ओलीलाई प्रधानमन्त्रीबाट राजीनामा दिन आग्रह गरेपछि नेकपा भित्रको संकट गहिरिएको विश्लेषण गरिएको वेला डा झाको यस्तो विचार आएको हो ।  

‘दुइमहिना अगाडि नेकपामा यस्तै संकट उत्पन्न भएको थियो । यसलाई राम्रोसँग हल नगरिए फेरि दुइमहिनामा यस्तै अवस्था नआउला भन्न सकिन्न’ डा झाको विश्लेषण छ । 

नेकपा भित्रको विबाद अंकगणितीय चरणमा प्रवेश गरेमा त्यो देशका लागि दुर्भाग्य हुने उनको विश्लेषण छ । ‘कोरोना संकटले जर्जर बनेको अर्थतन्त्र पूरानै अवस्थामा आउन पाँच वर्ष लाग्न सक्छ । यस्तो बेला जनताले दिएको दुइतिहाइ बहुमतको अवमूल्यन गर्दा त्यो नेकपालाई महंगो पर्न सक्छ ।’

राजनीतिक स्थायित्वसँगै नेपाल आर्थिक विकास र समृद्धिको चरणमा प्रवेश गरोस् भन्ने छिमेकीको सद्भावलाई नविर्सन उनले नेकपा नेताहरुलाइ आग्रह गरे ।