नेपाल कम्युनिस्ट पार्टी (नेकपा)का अध्यक्षद्वय प्रधानमन्त्री केपी शर्मा ओली र पुष्पकमल दाहाल 'प्रचण्ड'बीच सहमति जुट्न नसक्दा नेकपा स्थायी कमिटीको बैठक असार २२ गते सोमवारसम्मको लागि स्थगित भएको छ ।

शुक्रवार दिनभरमा सहमति खोज्न भन्दै बिहीवार बसेको स्थायी कमिटी बैठक आज शनिवारसम्मको लागि स्थगित गरिएको थियो । 

स्थायी कमिटी सदस्य हरिबोल गजुरेलले सोमवारसम्म बैठक स्थगित भएको लोकान्तरलाई जानकारी दिए ।

ओली– प्रचण्डबीच शुक्रवार भएको वार्ता निश्कर्षबिहीन भएपछि स्थायी कमिटीको आजको बैठक स्थगित भएको हो । 

शुक्रवारको छलफलमा प्रचण्डले आलोपालो प्रधानमन्त्री बन्ने २०७५ जेठ २ गतेको सहमतिमा फर्किन प्रस्ताव गरेका थिए । ओलीले भने प्रचण्डलाई कार्यकारी अध्यक्ष बनाउने र पाँच वर्षसम्म आफैले सरकार चलाउने गरी २०७६ मंसिरमा भएको सहमति कार्यान्वयनमा जोड दिएका थिए । 

स्थायी कमिटी सदस्य गजुरेलले दुई अध्यक्षबीच शनिवार दिउँसो छलफल हुने बताए ।

‘संवादहीनताको स्थिती अन्त्य भएको छ, अध्यक्षद्वयबीच सहमति गरेर स्थायी कमिटी बस्छ,’ गजुरेलले भने ।

अर्का स्थायी कमिटी सदस्य गणेश साहले दुई अध्यक्षबीच छलफलका लागि बैठक सोमवारसम्म स्थगित भएको जानकारी गराए । असार १० गतेदेखि शुरू भएको नेकपा बैठकमा गत मंगलवार प्रचण्डलगायत शीर्ष नेताले प्रधानमन्त्रीबाट ओलीको राजीनामा माग गरेपछि नेकपा बिबाद पेचिलो बनेको छ । 

दिउँसो बस्ने बैठकअघि ओली प्रचण्ड दुवै नेताले आफू निकटस्थहरुसँग परामर्श गरेका छन् ।