चीनका अधिकांश कूटनीतिकर्मीहरूले उक्त देशको परराष्ट्रनीतिलाई कठोर तरिकाले अघि बढाइरहेको भए पनि नेपालका लागि चिनियाँ राजदूत होउ याङ्छीले नेपालीहरूको मन जित्न सौम्य उपाय अपनाइरहेकी छन् । 

उनले काम गर्ने तरिकाले अन्य चिनियाँ राजदूतको भन्दा फरक छ । 

अन्तर्राष्ट्रिय सञ्चारमाध्यमले चिनियाँ कूटनीतिकर्मीहरूका लागि वुल्फ वारियर नाम दिएका छन् किनकि उनीहरू उग्र र अमर्यादित तरिका अपनाउँछन् र आधारहीन षड्यन्त्र रचेको आरोप लगाउँछन् भन्ने गरेका छन् । 

नेपाललाई चीनको निकट बनाउनका लागि राजदूत होउ सफल भएको भन्दै नेपाल र भारतको मिडियामा चर्चा कमाएकी छन् । 

नेपालमा चीनको राजनीतिक जरा बलियो बन्नमा भारतको नीति जिम्मेवार रहेको धेरै मानिसको मान्यता छ । 

भारत र नेपालले सीमाविवादलाई वर्षौंसम्म त्यत्तिकै छोडेर समाधान गरेनन् । दुई देशबीच सांस्कृतिक तथा आर्थिक सम्बन्ध बलियो भए पनि एकअर्काप्रति विश्वासको वातावरण छैन । 

प्रधानमन्त्री केपी शर्मा ओलीले उग्रराष्ट्रवाद जगाएर नेपाल भारत सम्बन्धलाई नयाँ तरिकाले परिभाषित गर्न खोजेको बताइन्छ । 

नक्सा जारी गर्ने कदम चालेर ओलीले भारतलाई छक्क पारेको बताइन्छ । सन् २०१८ मा भएको चुनावमा ओलीले भारतविरोधी अभियान चलाएका थिए र भारतले नेपालको राजनीतिमा धेरै दखल दिने गरेको बताएका थिए । 

त्यसक्रममा चीनले आर्थिक तथा अन्य सहयोगको माध्यमले नेपालसँगको सम्बन्ध बलियो बनाउन खोजिरहेको थियो । 

दुई वर्षदेखि राजदूत होउले संसारलाई चीन नेपालका लागि धेरै काम गरिरहेको बताउँदै आएकी थिइन् । 
 

होउ सामाजिक सञ्जाल, विशेषगरी ट्विटर, मा बढी नै सक्रिय छिन् । चीनमा ट्विटर प्रतिबन्धित छ तर चिनियाँ राजदूतहरू आफू चाहिँ ट्विटरमा बढी नै सक्रिय छन् । 
 

होउको अकाउन्टमा ४० हजारभन्दा बढी फलोअर छन् र उनी चीन–नेपाल सम्बन्ध गहिरो भएको याद दिलाइरहन्छिन् । 

कोरोना महामारीका बेलामा नेपाललाई चीनले दिएको सहायताका बारेमा उनले धेरै ट्वीट गरिन् । 

उनी सबैकुरा चुपचाप गर्छिन् । काठमाडौंबाट निस्कने एक अंग्रेजी दैनिकमा माओको फोटो छापिँदा मात्र उनी क्रुद्ध बनेकी थिइन् । 

उनी चीन र नेपालको निकटता बढ्दै गएको विषयलाई निकै सराहना गर्छिन् । 
 

होउले काम गर्ने तरिका भारतको भन्दा ठ्याक्कै उल्टो छ । 

नेपालले लगातार कोशिश गरिरहेको भए पनि भारत सीमाविवादका लागि तयार भएन र नेपालको जायज गुनासोलाई पनि चीनको उक्साहटमा आएर चालिएको कदम भनी अपमानित गरिरह्यो । 

नेपालमा चिनियाँ राजदूतको विनम्र दृष्टिकोणले राजनीतिमा कति दखल दिलाउन सकेको छ भन्ने पत्ता लगाउन गाह्रो छ । 

गुटमा विभाजित नेपाल कम्युनिस्ट पार्टीलाई टुट्न नदिन उनले महत्त्वपूर्ण भूमिका निर्वाह गरेको बताइन्छ । राजदूत होउले हस्तक्षेप नगरेको भए प्रधानमन्त्री ओली बाहिरिइसक्ने बताइन्छ । 
 

राजदूतहरू आफू खटिएको देशको आन्तरिक राजनीतिबाट टाढै रहन्छन् । तर नेपालमा त्यसो हुँदैन । 
 

होउ भारतका लागि चिन्ताको विषय बनेकी छन् । 

नेपाललाई भारतबाट अलग्याउनका लागि होउको दिमागले काम गरेको भनी भारतको एक अंग्रेजी न्युज च्यानल डब्ल्यूआईओएनले लेखेको छ ।

बीबीसी हिन्दीबाट